Тывада албан медицина камгаладылгазының девискээр фондузунуң удуртукчу Шолбан Күжүгет Тываның Чазааның 2024 чылда ажыл-чорудулгазының түңнелдерин таныштырары-биле Сүт-Хөл кожуунче үнүүшкүн кылганын дыңнаткан.
– Тускай ажылчын бөлүк-биле Сүт-Хөл кожуунче үнүүшкүн кылып, Тываның Чазааның отчедун таныштырдывыс. Ийи аңгы бөлүк Ишкин, Кызыл-Тайга, Кара-Чыраа, Бора-Тайга, Ак-Даш, Алдан-Маадыр сумуларынга четкен. Кожуун төвү Суг-Аксынга ниити бөлүүвүс чон-биле ужуражылганы эрттирдивис.
Тывавыстың Чазааның 2024 чылда ажыл-чорудулгазын таныштырбышаан, чонну дүвүредип турар нарын айтырыгларын демдеглеп алдывыс.
Сүт-хөлчүлер орук чаартылгазы, чаа школалар тудуу, школа болгаш уруглар садтарының үндезин септелгези, эрик камгалалы, часкы, чайгы суггат системазы, аныяк тускай мергежилдиглерге көдээ черлерге ажылдаарынга таарымчалыг байдал болгаш деткимчени көргүзери дээш оон-даа хөй айтырыгларны көдүрүп, ажыт-чажыт чок чугааны кылдылар. Чогуур яамыларның төлээлери оларның айтырыгларынга харыыларны берген.
Тыва Чазаавыстың 2024 чылда отчеду-биле чон таныжып дооскан соонда, чуртувуста элээн хөй ажыл кылдынганын олар онза демдеглеп, түңнелдерин үнелеп, ам-даа чедиишкиннерни күзедилер.
