Барыын-Хемчик кожуунга республика чергелиг «Төрээн кожуун» деп хоочун эр ойнакчылар аразынга хол бөмбүүнүң маргылдаазы болуп эрткенин Сүт-Хөл кожууннуң чагырга чери дыңнаткан.
Маргылдаага 28 команда киришкен. Дөртен хардан өрү назылыглардан 14, бежен хардан өрү назылыг киржикчилерден 14 команда тургустунган.
Бежен хардан өрү назылыг хол бөмбүкчүлериниң аразынга Сүт-Хөл кожууннуң командазы бүзүрелдии-биле бирги черни чаалап алган. Тиилекчи команданың тренери Тываның алдарлыг артизи Роман Ондар база хол бөмбүүнүң хоочун ойнакчызы, республиканың каш дакпыр чемпиону Якир Ондар кожуун чагыргазынга шилчип чоруур кубокту дамчыткан.
Бежен хардан өрү назылыглар аразынга I черни Сүт-Хөл, II черни Улуг-Хем, III черни Барыын-Хемчик, IV черни Бии-Хемниң командалары чаалап алган.
Дөртен хардан өрү назылыглар аразынга I черде Улуг-Хем, II черде Эрзин, III черде Кызыл кожуун, IV черни Бии-Хем.
Тускай шаңналдарга төлептиглерни база шаңнап-мактаан.
«Төрээн кожуун» республика чергелиг хол бөмбүүнүң маргылдаазының төөгүзүнден ап келирге, бир дугаарында эртип турда база Сүт-Хөл кожууннуң командазы тиилээн турган. Ам шупту кожууннарны эргээш, ийи дугаар эргилдези эгелээнде сүт-хөлчүлер база тиилелгелиг болганы кожуунга улуг өөрүшкү дээрзин чагырга чери онзалап демдеглээн.
Сүт-Хөлде хол бөмбүүн улам-на сайзырадып, кожууннуң адын аңгы-аңгы деңнелдиң маргылдааларынга үргүлчү бедик тудуп, тиилелгени чедип ап турар кызымаккай спортчуларга кожуун чагыргазы байыр чедирип, ам-даа бедик чедиишкиннерни күзээн.
