Амгы үеде Кызылдан Москваже ужуп турар ийи рейске база бир рейсти (август 5-тен ужуп эгелээр) ажыткан. Июньда Тываның чазаа-биле чарган дугуржулга езугаар, S7 Airlines (Сибирь) компания немелде рейсти ажыдарын шиитпирлээн.
Бо үеге чедир Кызыл – Москва аразынга ужудуушкуннарны вторникте база улуг-хүннерде чоруп турган (Москвадан понедельникте болгаш субботада ужуп үнер). Чаа рейс Москвадан средада ужуп келгеш, Кызылдан четвергте ужуп үнер. Тываның Баштыңы Владислав Ховалыг социал четкилерде ужудуушкунга эптиг хүннү шилип алыры чиигээнин демдеглээн. Баштайгы медээлерден алырга, билеттиң өртээ 26,3 муң рубльден эгелээр. Airbus A319 биле Airbus A320 самолеттар-биле ужар.
Оон аңгыда, S7 авиакомпаниязы Тываның эрге-чагыргазының дилээ-биле, Кызылга август 18-те ажыттынар делегей чергелиг IV сарыг шажын шуулган-биле дүгжүп турар кылдыр, август 17 биле 19-та ийи чартерлиг ужудуушкунну чарлаан.
«Август 17, 19 хүннеринде биске ужуп келгеш, дедир август 17, 19-та чанып болур. Хемчегниң киржикчилери бистиң культуравыс-биле таныжып, Тываның каас-чараш черлерин көөр аргалыг болур, а чаңгыс чер чурттугларывыска – дедир ээп чанарынга немелде рейс-тир» – деп, Тываның Баштыңы чугаалаан.
S7 Airline кампания 2023 чылда Тывадан авиааргыжылганы чорудуп эгелээнин сагындыраал. Москваже угланыышкындан аңгыда, Новосибирскче рейстер база бар. Бөгүн компания Кызылдың аэропортундан шупту ужудуушкуннарның 50 ажыг хуузун кылып турарын ТР-ниң Транспорт яамызы дыңнаткан.
«Ужудуушкун программазын калбартканы Тывага сонуургал өскенин көргүзүп турар, ынчангаш республикаже транспорттуң чедингирин ам-даа хөгжүдер бис» – деп, Владислав Ховалыг S7 авиакомпания-биле кады боттандырар планнарын дыңнаткан. Ылаңгыя, Кызыл биле Иркутск аразынга доктаамал ужудуушкуннарны бо чоокку үеде ажыдарын сайгарып турар.
#Тывачазак #ТМГМедээлер #Тыва #Тывамедээ #Тывадыл #Тывамедиагрупп #Тува
