Күскү дыштанылга үезинде Тываның Алдан-Маадыр аттыг Национал музейниң Туран хоорайда төөгү болгаш чурт-шинчилел салбыры болур культура объектизиниң аалчылары үзүлбээн.
Чаартынган Сафьяновтар аттыг музейниң ээлчеглиг аалчылары – Тускай шериг операциязының киржикчилериниң ажы-төлү, Аржаан школазының өөреникчилери.
Музейниң эргелекчизи Татьяна Верещагина Туранның тургустунганының төөгүзүнүң, тываларның Эккендей деп хүндүлеп адай бергени хувискаалчы Иннокентий Сафьяновтуң амыдырал-чуртталгазының, Аржаан-1, Аржаан-2 базырыктар дугайында тодаргай таныштырып, экскурсияны эрттирген. Уруглар ажыктыг болгаш солун чүүлдерни көрүп, билип алганнар.
Культурлуг дыштанылга улаштыр бот-идепкейжи аныяктарның төвүнге уламчылаан. Төптүң ажылдакчылары элээди аржаанчыларга чогаадыкчы мастерскаяга база кино залынга солун ужуражылганы эрттирген. Олар "Солдатка чагаа" деп акцияга идепкейлиг киржип, тускай шериг операциязының дайынчыларынга чоргааралын илередип, чылыг-чымчак сөстерни бижип, кан кадык чанып кээрин күзээннер.
Аржаан суму чагыргазының удуртулгазы тускай шериг операциязының киржикчилериниң ажы-төлүнге кожуун төвүнче үнүүшкүннү организастаан. Олар “Ада-чурттуң камгалакчылары” күрүне фондузунуң салбырының кожуунда социал координатору Шимит Сувакка, музейниң болгаш аныяктар төвүнүң удуртулгазынга четтиргенин илереткен.
