Сайгарлыкчы чоруктуң байдалын бүгү талалыг экижидер

Тывада дыка хөй араттар болгаш көдээ ажыл-агый кооперативтери национал төлевилел боттанылгазының күрүне деткимчезин ажыглап турар. “Биче болгаш ортумак сайгарлыкчы чорук болгаш хууда сайгарлыкчы чорукту деткиири” национал төлевилел-биле күрүне деткимчезин ап турар агробизнес төлээлериниң саны Тывада көвүдээн.

Тыва Республикада араттарны база көдээ ажыл-агый кооперативтерин деткииринче Национал төлевилелдиң “Биче болгаш ортумак сайгарлыкчы чорук субъектилерин дүрген хөгжүдери” федералдыг төлевилел-биле 43 сая 368 муң рубльди тускайлаан.

Регионнуң Көдээ ажыл-агый болгаш аъш-чем яамызы национал төлевилелде көрдүнген үш угланыышкынны боттандырып турар. Эгелеп чоруур араттар «Агростартап» грантыны алыр мөөрейге киржирлер. Республиканың он үш кожуунундан он дөрт арат ол мөөрейге тиилээш, ажыл-агыйының хөгжүлдезинче акша-хөреңгини алган.

Ийиги грантын көдээ ажыл-агый кооперативтериниң хөгжүлдезинче угландырган. Бо чылын тос көдээ ажыл-агый кооперативтери эт-хөреңги, техника, дериг-херексел база көдээ ажыл-агый продукциязы садып алганы-биле чарыгдаан акшазынга субсидияларны алган.

Үшкү угланыышкын – бүрүн эргелиг төптүң көдээ ажыл-агый кооперация база араттар деткиир адырында ажылдың чарыгдалдарын эгидери. Тывада төптүң бүрүн эргелерин ТР-ниң арат бизнезин база көдээ ажыл-агый кооперативтерин хөгжүдер фонд күүседип турар.

Фондунуң специалистери көдээ черлерде хууда дузалал ажыл-агыйлыг кижилерге, тараачын (арат) ажыл-агыйларынга, көдээ ажыл-агый кооперативтеринге информация-консультация ачы-дузаларын көргүзүп турар. Фонд тос ай дургузунда биче хемчээлдиг ажыл-агыйларның база көдээ ажыл-агый кооперативтериниң 295 субъектизинге тайылбырны берген.

“Биче болгаш ортумак сайгарлыкчы чорук болгаш хууда сайгарлыкчы чорукту деткиири” национал төлевилел Россияда сайгарлыкчы чоруктуң байдалын бүгү талалыг экижидеринче угланган. Төлевилелдиң концепциязы езугаар, Россияда биче болгаш ортумак сайгарлыкчы чорукта ажылдап турар кижилерниң саны 2024 чылда 25 сая чедер ужурлуг.