Чөөн-Хемчик кожууннуң Чыраа-Бажы сумузунда ажыл-биле бот-хандыртынган сайгарлыкчыларның бирээзи – Сайзана Донгак. Ол хайындырарынга белен аъш-чем бүдүрер биче цехти ажыдып алган.
Эгелеп чоруур сайгарлыкчы хайындырарынга белен аъш-чем: манчы, бууза, тырткан, котлета, тефтельдер, үскен далган, доңурган болгаш тырткан эът, сөөктүг эът, малдың ижин-хырынын, ак чемни (тыва доңурга, шөйген быштак, ээжегей, өреме, өл ааржы...) садып турар.
Сайзана Донгак дөрт ажы-төлдүг. Өөнүң ээзи Маадыр Донгак –«Строй-Экспресс» кызыгаарлыг харыысалгалыг ниитилелде орукчу. Цехтиң ээзи сумунуң херээженнер чөвүлелиниң кежигүнү база.
– Сайзана Донгак Чыраа-Бажы сумузунуң херээженнер чөвүлелиниң кежигүнү болганындан бээр үш чыл чедип тур. Ол кызымаккай, тура-соруктуг, күзээнин албан чедип алыр кижи. Хөй-ниитичи сумудан ырак эвесте "Шык Бажы"деп черде чурттап турар. Ында 18 өреге бар. Сайзана Донгак өг-бүлелерни эвилелдеп, кожуун чергелиг аңгы-аңгы хемчеглерже киириштирип турар – деп, сумунуң «Салгал» уруглар садының ыры башкызы Уран Сонам демдеглеп турар.
“Социал керээ” программаның киржикчизи күрүнеден алган деткимче-биле эът тыртар бүдүрүлге машиназы, соодукчулар, тускай стол, деңзи, вакуумнуг хаптаашкын аппарадын садып алган.
#Чөөн_хемчиккожуун #Чыраа_бажы #Социалкерээ #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
