Тыва делегей чергелиг «Сактыышкынның сады» экологтуг-ада-чуртчу акцияда киржип турар.
Бо чылын делегей чергелиг акция чеди дугаар эртип турар. Апрель 21-де эгелээр акция республиканың чурттакчыларын чугула болгаш ханы ужур-уткалыг хемчег-биле Төрээн чурту дээш амы-тынын берген маадырлар дугайында сактыышкынын кадагалап арттырары-биле демнештирер.
Акцияның кол сорулгазы – Ада-чурттуң Улуг дайынының үезинде мөчээн кижи бүрүзүнге тураскаадып, 27 сая ыяшты тарып олуртуру. Бо чылын акцияны бистиң үениң маадырларынга – бөгүнде чурттуң бот-догунннаашкынын камгалап турар тускай шериг операциязының киржикчилеринге база тураскааткан.
«Тываның муниципалдыг тургузуглар девсикээрлеринге акция-биле үш муң ажыг ыяшты тарыыры планнаттынган. Оон аңгыда республиканың арга-арыг фондузунуң черлеринге бир сая 196 муң ыяшты тарыыр» – деп, регионнуң Арга-арыг ажыл-агый болгаш бойдус яамызы дыңнаткан.
Май 19-та Кызылдың арга-арыг ажыл-агыйнының девискээринге акцияның кол хемчээ болуп эртер. Ында 10 гектар черге 20 муң ажыг анаа хадыларны олуртур. Күзелдиг кижи акцияга киржип болур. Ынчаарда «Сактыышкынның сады» деп албан езузунуң сайтызынга бүрүткедип алгаш, интерактивтиг картадан таарымчалыг черни шилип алыр.
