Бөгүн Тываның бөлүк чогаалчылары республиканы 40 ажыг чылдар иштинде, Тыва Арат Республика турганындан эгелээш, удуртуп-баштап келген билдингир совет күрүне ажылдакчызы, Тываның улустуң чогаалчызы Салчак Калбак-Хөрекович Токаның өскен, терээн чурту Мергенге барып, чон-биле, Каа-Хем кожууннуң удуртукчу даргалары-биле ужурашкан.
Чугааның, ужуражылганың кол сорулгазы - САЛЧАК ТОКАНЫҢ адын мөңгежидер ажылдарны чорудары. Ооң чогаалдарын катап үндүрүп, тос чадырын катап кылып, турисчи кокпаларны Мергенче изээри болур. Элээн хөй ажылдарны дарый кылып чорудары чугула дээрзин чыглып келген чон-даа ,барган чогаалчылар-даа аразында дугуржуп алганы өөрүнчүг.
Чогаалчының «Араттың сөзү» деп номун делегейниң хөй-хөй дылдарынче очулдурган, ол дээш Салчак Тока Сталин аттыг (сөөлүнде Ленин шаңналы деп эде адаан) күрүне шаңналын алган. Ол бедик күрүне шаңналының эдеринчи акшазы шаңналы-биле Салчак Калбак-Хөрекович Мергенде көдээ клуб туттуруп каан. Ол ам-даа ажылдап турар. Ооң чанында Токаның хөрек тураскаалын тургускан.
Совет үелерде Токаның чурту Мергенче иштикиден, даштыкыдан хөй туристер кээп турган.
