Дзюдога Россия чемпионаттарының мөңгүн болгаш хүлер медальдарының, Россия болгаш Европа Кубоктарының эдилекчизи, делегей чергелиг спорт мастери Саян Ондар бо, 2022 чылдың Республика хүнүнге болгаш малчыннар Наадымының тыва хүреш маргылдаазының дугайында социал четкилерде бодунуң арынынга бодалын илереткен.
«Наадым байырлалы таварыштыр чаңчыл болган чылдың-на эртип турар тыва хүрешке 256 эң шыырак,шилиндек мөгениң хүрежи болуп эрти.
Шупту билир болгай бис, Наадым хурежи дээрге-ле, өске хүрештерден ылгалдыг- чүгле Наадым хүрежинге мөгелер Тыва Республиканың күрүнениң хүндүлүг аттарын чедип ап болур болгай.
Бо чылдың Наадым хүрежиниң бир онзагай чүүлү болза, бистиң хүреживиске, ону улам-дам солун боор кылдыр, кожавыс Моолдан күрүне чергелиг 3 Хартыга-мөге болгаш 1 аймак Начыны мөгелер кээп хурештилер.
Аалчы мөгелерден чүгле чаңгыс мөге шаңналдыг чер киир хурешти. Ол болза, Моолдуң күрүне Хартыгазы Шархуугийн Пурэвгардъ болду.
Ол 8 мөге аразынга келгеш, Тываның Арзылаң-мөгези тургаш, бо удаада база катап шүүлгеш, республиканың Чаан-мөгези хүндүлүг күрүне адын чаалап алган Айдың Монгушка буттадыпкаш арыг октатты.
Бистиң мөгевис Айдың Монгуш ол мөгени, ооң чаа көстүп, кончуг дээн шыырак хүрежи берген үезинде бодунуң чурттунга- Моол курунеге хүрежип барып чорааш, база-ла шак-ла ынчаар октап турганын дыка эки сактыр мен. Бо удаада бистиң мөгевис база оон күштүүн бадыткап, моол мөгени арыг октааш чонун өөртүп калды.
Бо чылдың Наадым хүрежи болза-даа дүжүткүр болду: 1 Чаан-мөге, 3 Хартыга-мөгелер болгаш 3 Начын-мөгелер төрүттүнген элбек чыл болду.
Ол чүнү көргүзүп турар дээрге,чаңгыс кижи октап алыры безин кончуг берге, нарын турбуже, шаңналдыг чер кирип, шүүп турар дээрге-ле , тыва мөгелерниң черле ниити белеткелиниң шыыраан болгаш арга- дуржулгазының деңнели бедип турарының бадыткалы-дыр»- деп делегей чергелиг спорт мастери Саян Ондар демдеглээн.
«Ынчангаш база катап шаңналдыг чер киир эки хурешкен мөгелерге изиг байыр!»- деп, ам бо хүнде «Сүбедей» спорт комплекизиниң директору болуп ажылдап турар алдарлыг спортчу Саян Ондар Наадым хүрежиниң тиилекчилеринге байыр чедирген.
Чуруктарны ажык дөстерден алган
