Самбога ийи дакпыр делегей чемпиону Саян Хертекке төрээн черинге квартира

Тываның Баштыңы Владислав Ховалыг самбога делегей чемпиону Саян Хертек база ооң тренерлери-биле ужурашкан.

Ноябрь 11-де, Бишкек хоорайга тыва мөге Саян Хертек алдын медальды чаалап алган. Ол ооң делегей чергелиг ийиги алдыны болган. Владислав Ховалыг -биле ужуражылгага Тываның спорт сайыды Субудай Монгуш, спортчунуң ат-сураглыг тренерлери, «Самбо-70» деп спорт болгаш өөредилге төвүнүң төлээлери Павел Фунтиков биле Денис Павлов келген.

Россияның Президентизи В.В. Путин ноябрь 16-ны Самбо хүнү кылдыр доктаадыр чарлыкка атты декабрь 19-та салганы билдинип келген. Ам чылдың-на ноябрь 16-да ол хүннү демдеглээр.

Саян малчын араттың чымыштыг ажыл-ижин, ооң ада-иези малын малдаар дээш, кандыг кадыг-берге ажылды кылып турарын чугаалаарга, спортчунуң быжыг тура-соруу база шыдамыкайы оон үнген-дир деп, тренерлери чугаа аразында үлешкен.

– Чыккылама сооктарда малчыннарны база малды камгалаар дээш, кижилерни вертолеттан бадырып турган деп чугаалаарга, шыны херек, карактарывыс аңгайып каан. Ындыг берге байдалдарны шыдаар-ла кижи шыдаар, ооң бадыткалы Саян-дыр – деп, Павел Фунтиков чугаалаан.

Ужуражылганың киржикчилери маргылдаа үезинде чемпионнуң тиилелгезиниң дугайында бодалдарын үлежип, таваржы бээр бергедээшкиннерин чугаалашкан. Мөгениң удурланыкчылары шыырак болганын, тиилелгени чедип алырынга күзел-сорук база шыдамыкай чоруу негеттингенин сонуургаткан.

Амгы үеде Россияның Иштики херектер яамызының Москва облазында ажылдакчызы – самбо биле дзюдога дивизия маргылдааларының доктаамал киржикчизи. «Дайынчы хөделиишкиннер хоочуну» деп эрге-байдалдыг.

Бөгүнде Тывада самбо залын тудуп турар, чурттуң болгаш төрээн чериниң мурнунга ачы-хавыяазы дээш, Саян Хертектиң адын аңаа тыпсыр деп турарын спорт сайыды Субудай Монгуш дыңнаткан.
Тываның Баштыңы Владислав Ховалыг төрээн черинге квартирадан спортчуга аңгылап бээр айтырыгны шиитпирлээрин сайытка онааган.

Спортчуларны алгап-мактаан “Спортчу элита – 2022” чылдың байырлалында, Павел Фунтиков биле Денис Павловка “Тыва Республиканың алдарлыг тренерлери” хүндүлүг аттарны байырлыг байдалга тывыскан.