XXI дугаар республика чергелиг “Сарадак-2026” деп бичии хөөмейжилер мөөрейиниң Дээди шаңналының эдилекчизи – Сайын-оол Ондар (Р. Кенденбиль аттыг уран чүүл школазы). Удуртукчу башкызы – Хеймер-оол Ховалыг.
«Ада көрбээнин оглу көөр» дээни дег, хүндүлүг башкым Коңгар-оол Ондарның оглу Сайын-оол Ондар бөгүн болуп эрткен «Сарадак-2026» мөөрейинге Дээди шаңнал алганынга улуг өөрүп, чоргаарландым. Адазының изин салгап, ам-даа хөөмей-сыгыттың чажыттарын бодунга ажыдып, эки өөренирин күзедим» – деп, Тыва үндезин культура төвүнүң удуртукчузу Игорь Көшкендей соцчеткилерде бижээн.
Коңгар-оол Борисовичиниң туруштуг ажылының ачызында бо хүн хөөмей болгаш тыва хөгжүм бүгү делегейде чаңгыланып турар. Бөмбүрзектиң хөй-хөй чурттарының хүндүлүг аалчызы, аныяк-өскенниң башкызы, деткикчизи, сүмелекчизи чораан.
Тываның Улустуң хөөмейжизиниң эгелээн ажылын уламчылавышаан, амгы үеде ооң хөй санныг өөреникчилери тыва культураны сайзырадып, чонунга бараан болуп чоруур.
