Хенертен чылып, харның дүрген эрип эгелээни-биле, иемдик черлерден баткан суглар Тываның элээн каш муниципалдыг тургузугларында кудумчуларны болгаш өрегелерниң девискээрлерин алган таварылгалар демдеглеттинген.
Тургустунуп болур айыыл-халапка өй-шаанда белен турары-биле баш бурунгаар документилерни, бирги хереглелдиң хууда эт-севин белеткеп ап, ону көскү черге салып алыры чугула. Документилерни, аргалыг-ла болза, суг өтпес хапка азы суг кирбес савага шыгжааны дээре.
Айыылды баш удур болдурбазы-биле чурттап турар бажың-балгаттың долгандыр турар шөлде чыглы берген харны, боктарны баш удур аштап-арыглаары чугула. Ол ышкаш суг чайладыр оруктарны, хоолайларны баш удур аштап-арыглаар.
Онза байдалдар үезинде аъш-чем аймааның курлавырын болгаш баштайгы үеде чугула херек чүүлдерни белеткээр. Эт-сеп, өртектиг болгаш өске-даа чүүлдерни кырыкы каъттарга азы суг албас бедик черлерже дажыглаар. Херим иштинде сугга алзып болур ажыл-агыйжы эт-херекселдерни утпазы чугула.
