"Чуртталга бажыңнары болгаш хоорай хүрээлели” национал төлевилелди боттандырар дээш, Тываның Чазааның эргижирээн болгаш чурттаары айыылдыг, бустур четкен бажыңнардан чурттакчыларны чаа бажыңнарже көжүрериниң программазының чорудуу-биле Чеди-Хөл кожууннуң Хову-Аксы суурда чаагайжыды туттунган бажыңнарның чурттакчылары дүлгүүрлерин алган.
Гагарин 1а кудумчузунда хөй аал чурттар бажыңның аас-кежиктиг өг-бүлелеринге өөрүнчүг болуушкун-биле байырны ТР-ниң Чазак Даргазының бирги оралакчызының албан-хүлээлгезин күүседип турар Александр Брокерт, тудуг сайыдының албан-хүлээлгезин күүседип турар Аяс Хунай-оол база Чеди-Хөл кожуун чагыргазының удуртулгазы чедирип, дүлгүүрлерин байырлыг байдалга тывыскан.
Хову-Аксы сумузунда беш чаагайжыды туттунган бажыңнарның чурттакчылары – сезен ийи өг-бүле чаа квартираларның дүлгүүрлерин алганын Александр Брокерт дыңнаткан.
Чаа квартираның ээзи Оскал-оол Оюн чаа бажыңның чылыын, чырыын болгаш делгемин демдеглээн. Ол кожаларын долгандыр турар девискээрин чаагайжыдарынче кыйгырган.
Ол ышкаш Хову-Аксы сумузунуң баштыңы Айдыс Сайын-оол Юбилейный 3 база 9 дугаар кудумчуларда чаа бажыңнарның чурттакчыларынга дүлгүүрлерни тывыскан.
Чаа квартираларже көшкеннер Тываның Чазаанга, Тудуг яамызынга өөрүп четтиргенин илереткен.
