Бай-Тайга кожууннуң Тээли сумузунда Н. Өлзей-оол аттыг культура одааның ажылдакчылары Шагаа байырлалын уткуштур "Үш чүүл эртемниг Өскүс-оол" деп оюн-тоглаалыг шиижиткен көргүзүү-биле кожууннуң школачылары-биле ужуражылгаларны эрттиргенин чагырга чери дыңнаткан.
Өскүс-оол дугайында тоолду көргеш, ооң маадырлары-биле Шагаа байырлалының "Өрттеңнежир", "Аът шалбадаар", "Тевек", "Кажык-биле аът чарыштырар" деп оюннарны ажылдакчылар келген аалчыларынга өөредип, утказын тайылбырлап берген соонда, уруглар улуг сонуургал-биле ойнаан.
Ук көргүзүг уругларга өөредиглиг болгаш оларның амыдыралынга ажыктыг дээрзи билдингир. Чүге дизе олар тыва чоннуң чаңчылдарын болгаш бурун оюннарының ужур-утказын билип алырлар.
