Республиканың эмчи колледжизиниң хөй-ниити чуртталга бажыңында сургуулдарның чуртталгазы солун болгаш ажыктыг эртип турарын республиканың немелде өөредилге сайзырадыр төвү дыңнаткан. Ында аңгы-аңгы угланыышкынныг бөлгүмнер ажылдап турар.
Кижизидикчи башкы Рада Салчак «Өгнүң херээжен ээзи» бөлгүмүнге тыва национал чемнерниң бирээзи – шөйген быштакты белеткээрин уругларга өөреткен. Сургуулдар кылып алган чемин амзааш, бодалдары-биле үлешкеннер.
«Кижизидикчи башкывыс Рада Александровна бистерге национал тыва чемнерни кылып өөредип турар. Ол ышкаш кижиниң мага-бодунга сүттүң ажыктыын таныштырган. Инек сүдүнден 15 аңгы тыва аъш-чемни кылып болурун билип алдывыс» – деп, сургуулдар демдеглээн.
