Эрзин кожууннуң уран чогаалга база ыры-хөгжүмге салым-чаяанныгларының амыдыралынга чаа агым, угланыышкын немешкен. Ол болза, Эрзин кожууннуң шүлүкчүлериниң «Сеңгилең» чечен чогаал каттыжыышкынынга бот-тывынгыр композиторларның эвилелин кииргени база ук чогаадыкчы чөвүлелдиң удуртукчуларын соңгуп алганы болур.
Онза ужур-дузалыг хуралдың чоруудуунга кожуун чагыргазының культура эргелелиниң удуртукчузу Ольга Куулар, төпчүткен ном саң адырының хоочун ажылдакчызы Руслана Тарначы баштаан кежигүннер «Сеңгилең» чогаадыкчы чөвүлел-каттыжыышкынның удуртукчуларынче кордакчыларның даңзызын таныштырган.
Чаңгыс аай демниг бадылаашкынның түңнели-биле, кожууннуң шүлүкчүлериниң база аныяк чогаалчыларының чогаадыкчы ажыл-чорудуун удуртур кылдыр Тываның чогаалчылар эвилелиниң кежигүнү Чаяна Чыкай, аныяк композиторларның бижээн аялгаларын углап-баштап сайзырадыры-биле – Эрзинниң Демир-оол Кежиктиг аттыг уругларның уран чүүл школазының башкызы Солаңгы Шоолай база ол ышкаш чөвүлелдиң организастыг айтырыгларын харыылаар удуртукчуга Эрзинниң Василий Эренчин аттыг төп ном саңының номчулга залының эргелекчизи Алдынай Лопсан олар соңгуттурганнар.
Тываның Улустуң чогаалчызы Александр Даржайның сүмелээни-биле, республиканың уран чүүлүнге кол черни ээлеп чораан, хөй янзы салым-чаяанныг Бригад Дүпчүр база өөнүң ишти Мария Шойдун олар Эрзин кожууннуң «Сеңгилең» чечен чогаал каттыжыышкынын 1980 чылдарның ортан үезинде үндезилеп тургусканнар.
Уран чогаалдың баштайгы кичээлдеринге Сергей Чыргал, Зинаида Самбуу, Алдын-кыс Комбу база Роман Лудуп дээш оон-даа өске, сөөлүнде барып сураглыг чогаалчылар апаргылаан аныяк шүлүкчүлер киржип турган.
«Сеңгилеңниң» чаа соңгуттурган удуртулгазы кожууннуң Эрзин, Мөрен, Бай-Даг база Булуң-Бажы суурларының төлээлериниң санал-бодалдары, чогаадыкчы арга-дуржулгазы-биле таныжып, кады ажылдажылганың сорулгаларын илередири-биле чугааны кылып, бирги кичээлди чоруткан.
Дылы болгаш аян-ырызы онзагай, сагыш-сеткили уян, чараш, бай-байлак кижилерниң ужуражылгазы шүлүкчүлерниң уран номчулгазы база композиторларның чогааткан ырыларының бараалгадыы-биле уламчылаан.
Чаяна Чыкай
Сотрудники УФСИН России по РТ провели для школьников Шагонара правовой урок
Сотрудники исправительной колонии, дислоцирующейся в городе Шагонаре, подготовили и провели для учащихся средней общеобразовательной школы урок на тему «Скажи коррупции нет!».