Кызылда «Сүбедей» спорт комплекизинге 18 хар чедир назылыг оолдар аразынга база республиканың күш-ажылчы коллективтер болгаш муниципалдыг тургузуглар аразынга тыва хүрешке Тыва Республиканың Кубогу дээш “хана ханага” маргылдаа болуп эрткен.
ТР-ниң Дээди Хуралының Даргазы Кан-Оол Даваа маргылдааның хүндүлүг аалчызы болуп киришкен.
– Улуг байырлалывыс Шагаа бүдүүзүнде тыва чонувустуӊ эӊ ынак хүреш маргылдаалары «Сүбедей» өргээзинге болуп эртти.
Шагаа таварыштыр болуп турар барык шупту байырлыг хемчеглеривис Тываның эрес-дидим дайынчыларынга тураскаатакан дээр болза хөөредиг эвес. Бо удаада база мөгелерге болгаш чыылган чонга байыр чедирбишаан, дайынчы оолдарывыс хүлээлгезин төлептиг күүсеткеш, төрээн черинче бүдүн-бүрүн чанып келирин йөрээгеш маргылдааларны ажыттывыс – деп, ол чугаалаан.
Он сес хар чедир мөгелер аразынга болган хүрештиң сес шыырак мөгези.
Сүлде Донгак (Сүт-Хөл) шүүлген, Алдаржы Ондар (Сүт-Хөл) үжүүрлешкен. 3-4 шыырак мөгеде – Баз-оол Түлүш (Улуг-Хем), Айрат Ооржак (Сүт-Хөл). 5-8 кирген шыырак мөгелер – Сайын Сундуй (Тере-Хөл), Айыс Сарыглар (Сүт-Хөл), Максим Ооржак (Эрзин) база Солаан-Байыр Эрес-оол (Улуг-Хем).
Команда аайы-биле Россияның Онза байдалдар яамызының Тывада Кол эргелелиниң мөгелери шүүлген, Улуг-Хем кожуунуң командазы үжүүрлешкен. Үшкү шаңналдыг черге Сүт-Хөл кожууннуң мөгелери төлептиг болган. Ниитизи-биле 14 команда киришкен.
