Тывада ай санаашкыны-биле чаа чыл – Шагааны уткуурунга белеткел ажылдары чоруп турар. Бо чылын ол март 1-де дүжер. Байырлал хүннерде 30 ажыг массалыг хемчег планнаттынганы-биле, харыысалгалыг албан черлеринге хөй чон чыылган – шажын езулалдары, улусчу хөглээшкиннер, ярмаркалар дээш оон-даа өске черлерге айыыл чок чоруктуг хемчеглерин хандырарын республиканың Баштыңы Владислав Ховалыг дааскан. Оон аңгыда, республиканың амыдырал-хандырылга объектилери база онза байдалдар албан черлери күштелдирген чурумга ажылдаар.
Тываның Баштыңының эрттиргени аппарат хуралында Шагаага белеткелди чугаалашкан. Организаторларның дыңнатканы-биле алырга, марттың 1 дүнезинде чер-черлерге эрттирер “Саң салыр” езулал – ай санаашкыны-биле Чаа чылдың кол болуушкуну болур. Тываның найысылалы Кызылда кижилер эң хөй кээр тос аңгы чер – Улуг-Хем эриинде Национал паркка, Дөгээ даанга, Кадарчы тураскаалынга болгаш Түбтен Шедруб Линг хүрээниң чанынга езулалды эрттирери планнаттынган. Шак ындыг езулалдар март 1-де эртенгиниң 7 шак үезинде республиканың 174 чурттакчылыг черлеринге база болур.
Шагааның кол болуушкуннары февраль 28-тен март 1-ге чедир болур. Республика болгаш муниципалдыг деңнелде планнаан 900 хире хемчегниң чартыындан хөйү чоннуң киржилгези-биле эртер. Улуг хемчээлдиг байырлалдар үезинде айыыл чок чоруктуң чогуур деңнелин хандырар дизе, чүгле камгалал күштериниң курлавырлары чедишпес. Ынчангаш эрге-хоойлу камгалакчыларынга дузалажыры-биле эрге-чагырга органнарының албан-хаакчыларындан тургустунган ажылчын бөлүктерни хаара тудар.
ТР-ниң Иштики херектер яамызының орук-хайгыыл албанының ажылын күштелдирген чурумче шилчидер. Корум-чурум тударынче полиция-биле кады 400 хире дружинник үнер. Оон аңгыда республиканың Баштыңы март 3-ке чедир дыштаныр хүннер чарлаттынганындан, арага аймаа садарын хораан. Дыштаныр хонуктарда, март 1 биле 2 хүннеринде, амгы хоойлу езугаар арага садары хоруглуг.
Кеземче кылдыр шенелдеде шииттирген кижилерни, ооң иштинде административтиг хайгааралда кижилерни хынап, профилактиктиг хемчеглерни чорудар. Тус чер чагырга органнары малчын турлагларны онза контрольга алыр даалганы алган.
Март 1-де Шагаа байырлалының массалыг хемчеглери эгелээр. Кызылдың төп шөлүнге дүъш үезинде театржыткан көргүзүг болгаш концерт болур. Ол-ла хүнде 17 шакта, тыва национал оркестр бодунуң тускай байырлал программазын Национал театрга көргүзер.
