Ай санаашкыны-биле Чаа чыл – Шагаага уткуштур дайынчыларга ачы-дуза чедирер акция чоокта чаа Тывада эгелээн болгаш февраль 10-га чедир уламчылаар.
Төрээн черинге Шагаа байырлалы – февраль 18-ке чедир Улусчу фронтунуң регионалдыг салбыры Тываның Чазаа-биле кады «Улусчу фронт. Бүгү чүүлдү тиилелгеже!» төлевилелдиң чорудуу-биле чүъктү чедирерин планнаан.
Дайынчы хөделиишкиннер девискээринче 20 тоннаның, Донецк угланыышкынынче беш тоннаның база Курск талазынче беш тоннаның чүък автомашиналары үнүптер. Чыгдынган чүъктүң ниити деңзизи 30 тонна болур.
Баштайгы посылкалар адрестеринче чедип эгелээн. Чижээ, республиканың Чер болгаш өнчү хамаарылгаларының яамызы генераторлар, рациялар база эът аймаан; суд системазының хоочуннары генераторларны; хууда сайгарлыкчы Валерия Калзан ийи «Баофенг» болгаш ийи «ТУТ» маркалыг рацияны; Кызылдың чурттакчызы Роза Тумат ийи «Вектор» маркалыг рацияны дамчыткан.
Чаа доңурган эът аймаан база дузаламчы кылдыр чорудары чаңчыл апарган. Дайынчыларга амгы үеде генераторлары, агаар үрдүрүкчүлери, рациялар, ужудукчу чок аппараттар, ужудукчу чок системалар илередир, мотоциклдер болгаш автомашиналар эргежок херек деп Улусчу фронт дыңнаткан.
Бо чоокку хүннерде муниципалитет бүрүзүнге Шагаага уткуштур улуг номналдар үезинде ачы-дуза чыыр тус чер штабтарының идепкейжилери-биле ужуражылгалар болуп эртер.
Россияның буддистер ассамблеязы, Тываның Камба-Лама эргелели, К.Б. Ондар аттыг Тыва үндезин культура төвү катчып алгаш, бо хемчеглерни организастаар. Ужуражылгалар үезинде төптүң артистери оюн-көргүзүүн бараалгадыр, а Камба-Лама эргелелиниң ламалары мөргүлдерни эрттирер.
Шагаа бүдүүзүнде дайынчыларга белек-селек чыырынга база ону дамчыдарынга күзелдиг кижи киржип болур. Улусчу фронтунуң күүсекчи комитединиң дараазында адресте Чульдум кудумчузу, 40а бажыңда база Ленин кудумчузу, 5 дугаар бажыңда Тываның күрүне университединиң #Кадыбис штавында ачы-дуза чыылдазының пунктулары ажылдаар. Правобережная кудумчузунда 4 дугаар адресте көдээ ажыл-агый рыногунда эът аймаан хүлээп турар.
Айтырыглар бар болза 2-10-50 дугаарже долгааш, тодарадып болур.
Тыва чурттуң шупту регионнары дег, тускай шериг операциязының баштайгы хүннеринден эгелеп Төрээн чурттуң камгалакчыларын идепкейлиг деткип турар.
