Улуг-Хем кожууннуң төвү Шагаан-Арыгда өг-бүлениң хөй ажыл-чорудулгалыг төвүн ажытканын ТР-ниң Күш-ажыл яамызы дыңнаткан.
ТР-ниң Чазак Даргазының социал политика талазы-биле оралакчызы Орлан Сарыглар, күш-ажыл болгаш социал политика сайыды Эдуард Сандан кызыл кожааны кезип, төптүң ажылынга стартты берген.
Өг-бүлелер чаа ажыттынган төпке юридиктиг, психологтуг база социал айтырыглар талазы-биле бүгү талалыг дузаны, медээни болгаш арга-сүмени “чаңгыс соңга” чуруму-биле алыр аргалыг апарган.
Кожуунда 5812 ажы-төлдүг өг-бүле бар. Оларның хөй кезии кожуннуң төвүнде чурттап турар.
“Өг-бүлениң диспетчер албанының” ажылдакчыларындан улуг назылыг улус социал хандырылга талазы-биле, тускай шериг операциязында киржип турар дайынчыларның өг-бүлелериниң кежигүннери чиигелделер дээш оон-даа өске айтырыгларга тодаргай харыыларны ап болур.
Төпте уругларга ойнаар өрээлди аңгылаан. Кадыкшылының байдалы-биле харык-шинээ кызыгаарлыг улуска аргыжарынга бүгү-ле таарымчалыг байдалды тургускан.
