Тыва бо чоокку хүннерде ай санаашкыны-биле чоннуң Чаа чыл – Шагаа байырлалын февраль 10-да демдеглеп эрттирер. Частың башкы айы дүжерин санап, ооң хүнүн чылдың-на тодарадыр. Байырлал хүннеринде 800 ажыг культура-массалыг хемчеглер эртер.
Чаа чылда чаагай чүүлдерни дилеп, оран делегейге, ие-бойдузунга өөрүп четтиргенин илередип, ак чемни саңга өргүүр езулалды эрттирер черлерни тодараткан.
Февраль 10-да чоннуң киржилгези-биле саң ужудуп чаңчыга берген черлер – «Кадарчы» тураскаалдың, «Дөгээ» даанга, Культура болгаш дыштанылганың национал парыгынга, «Тубтен Шедруб Линг» хүрээниң чанынга «Саң салыр» езулалдар 07.00 шакта болур.
