Улуг-Хем кожуунда “Оргаадай” көдээ ажыл-агый бүдүрүлгези республикада сайзыралче чүткүлдүг ажыл-агыйларның бирээзи. Бүдүрүлге тараа шөлдерин улгаттырып, бо чылын сайзыралче элээн херии, дидим-дидим бурунгаар базымнарны кылган.
Кожуун чагыргазының даргазының бирги оралакчызы Уран Серин биле көдээ ажыл-агый эргелелиниң даргазы Болат Ховалыг бүдүрүлгениң ажыл-ижин сонуургап четкенин чагырга чери дыңнаткан.
“Оргаадай” бүдүрүлгезинге Волгоград хоорайдан “Фавор” фирманың инженерлери Андрей Левков, Константин Нерад база “ПромСибУрал” компанияның инженери Роман Черешнев үш хонук дургузунда улуг станоктарны эптээш, бүдүрүлгениң ажылдакчыларын аңаа ажылдаарын өөреткен.
Арбайны болбаазырадып, оон каржаңын дээш, далган аймаан кылырын, хлеб быжырар далганны хоюдур дээрбелээри, ол ышкаш кырлыг-караны аштап-арыглаар станоктарга ажылдаарын ажылдакчылар өөренип алганнар. Олар станоктар дузазы-биле шак дургузунда 150-200 кил далганны бүдүрүптер аргалыг апарган. Далганны тускай станоктар баш удур тургузуп каан программа езугаар кыска үе дургузунда белени-биле хаптаптар.
Чүгле арбайдан 8-10 хире аңгы далган аймаа үнүп кээр. Кырлыг-карадан ортопедтиг сыртыктар, кудустар бүдүрүп болурун, ол ышкаш огород, садтарга чемишчидилге кылдыр ажыглап болурун инженер Роман Черешнев сонуургадып тайылбырлаан. Тываның байлаа хөй, ону болбаазырадып сайзырадыр болза, чедиишкинниг болур дээрзин сургакчылап келген инженерлер демдеглээн.
“Оргаадай” бүдүрүлгезиниң удуртукчузу Эрес Мандан-оол ышкаш, шалыпкын-кежээ, бурунгаар чүткүлдүг болуп, бай-байлак оран-таңдының кежиинден салдынмайн, кат-чимис, эът-сүт болбаазырадыр цехтерни сайзырадып болурун кожуун чагыргазы демдеглээн.
