Кызыл кожууннуң Шамбалыгның культура төвүнүң болгаш ном саңының ажылдакчылары шанактыг аъттыг малчыннарга аалдап четкен.
Соок-Ирей аъдын тергелеп, Харжыгаш болгаш илби-шилбилиг эш-өөрү – тоолчургу маадырлар-биле Александр биле Раиса Ондарларның база Мерген биле Олимпиада Шүүчелерниң аалынга четкеш, Чаа чылдың байыр-найырзыг хөөнүн тургузуп, оюн-тоглаазын бараалгадып, чигир-чимистиг белектерин, ажык чагааларны, номнар, сеткүүлдерни тывыскан.
Сумунуң культура ажылдакчылары малчыннарже аъттыг үнүүшкүн кылырын шагда-ла бодап турганын Шамбалыгның культура төвүнүң директору дыңнаткан.
Шамбалыгның чагырга чери база сумунуң малчыннарын эргий кезип, Чаа чыл уткуштур байырын чедирип, кыштаглаашкын кайы хире эртип турарын хынап көрген. Фельдшер-акушер пунктузунуң эргелекчизи көдээ ишчилерниң кадыкшылының байдалын шинчилеп, халас эмнерни база үлээн.
Шамбалыг сумузунда ниитизи-биле 20 кыштаг бар. Хууда малчыннарның, “Кыштаг”, “Чаа сорук” төлевилиниң киржикчилериниң аалдарында кыштаглаашкын хүр-менди эртип турар.
