Чаа-Хөл ортумак школазының дөртен чылдап турар доозукчулары шажын-чүдүлгениң ыдыктыг чери – Бурган-Дааның девискээринде лама башкыларның мөргүлдер номчуур черинге хүнден, чаъстан чаглактаныр серини кылганын чагырга чери дыңнаткан.
1986 чылдың доозукчулары ыдыктыг черни чаагайжыдарынга үлүг-хуузун киирип, тыва улустуң «Демниг сааскан теве тудуп чиир» деп үлегер чугаазында дег, бир демниг ажылдааннар. Оларның аразында «алдын холдуг» тудугжулар – Леонид Даш, Алексей Минчит-оол, Мергелян Сенгии, Алдын-оол Араптан.
Тываның төвү Кызылга август 17-ден 20-ге чедир болуп эртер IV делегей чергелиг сарыг шажын шуулганы Сибирь федералдыг округка чылдың кол болуушкуннарының бирээзи болур. Аңаа бүгү Россиядан болгаш делегейден шажын-чүдүлге, эртем төлээлери, туристер чыглыр.
Чаа-Хөлде «Бурган-Даа» шажын объектизи – шуулганның шупту киржикчилеринге сорунзаның төп чери апаар.
Кожууннуң чагыргазы идепкейжи дөртен чылдааннарга четтиргенин илереткен.
