Шэньянга эртер «Россияга кылган» деп фестиваль-ярмаркага российжи продукцияны таныштырар

Кыдаттың Шэньян хоорайга «Россияга кылган» деп делгелге-фестивальга Россияга бүдүрген барааннарны делгеп көргүзер.
Россияның Экспорт төвү (ВЭБ.РФ группа) РФ-тиң Көдээ ажыл-агый яамызының деткимчези-биле ол хемчегни эрттирип турар.

Ярмарка 2025 чылдың январь 17-ден 25-ке чедир хоорайның эң улуг садыг-саарылга төптериниң бирээзи, сураглыг “Орус кудумчузунда” турар Shengjing Mall төвүнге болур. Ол хемчег Кыдаттың Чаа чыл байырлалы таварыштыр болуп эртер.

Шэньянның чурттакчылары российжи 40 ажыг региондан 120 бүдүрүлгениң продукциязы-биле таныжар. Аъш-чем барааннары, суксуннар, косметика, суй-белектер болгаш улусчу чогаадылга кылыгларын хөйү-биле делгээр. Сонуургаан продуктуларны амзап көөр кылдыр аалчыларга тускай зонаны аңгылаар, оон бүдүрүкчүнүң бодундан таарышканы продукцияны садып алыр арганы тургузар. Кыдаттың онлайн-шөлдеринде Россияның экспорт төвүнүң национал садыглары таварыштыр ол барааннарны садып ап база болур.

Россияның көдээ ажыл-агый сайыды Оксана Лут Россияның агроүлетпүр комплекизинде чугула партнер Кыдат болуп турар деп демдеглээн. Сөөлгү каш чылдарда аъш-чем продукциязының ийи талалыг садыглажылгазы элээн өзүп, хөгжүлдениң улуг аргаларын көргүзүп турар. Бедик шынарлыг российжи барааннар экспортунуң хемчээлин улгаттырары – кады ажылдажылганың мурнады көөр угланыышкыннарының бирээзи болуп артпышаан.

Фестиваль үезинде, Россияның бараан бүдүрүкчүлери боттарының барааннарының муң ажыг хевирлерин, ооң иштинде шоколад, доңурга, бакалея, сүт, балык болгаш эът продукциязын болгаш аңгы-аңгы суксуннарны бараалгадыр. Бо барааннарның хөй кезии кыдат садып алыкчыларның аразынга билдингир. Кыдаттың рыногунга шынарлыг российжи продукцияга хереглел ам-даа өзүп, ийи чурттуң аразында удур-дедир садыг-экономиктиг харылзааларны быжыглаарынга идигни бээр дээрзинге Оксана Лут бүзүрелин илереткен.

Ярмарка үезинде ийи чурттуң бизнес төлээлери моон-даа соңгаар кады ажылдаарының болгаш чаа төлевилелдерни боттандырарының айтырыгларын сайгарар ажыл-агыйжы ужуражылгаларны эрттирерин планнап турар.

«Россияга кылган» деп фестиваль-ярмаркалар төнчү хереглекчилер аразынга-даа, бизнес ниитилежилге төлээлериниң аразынга-даа боттарының продукциязын суртаалдаарынга немелде аргаларны Россияның компанияларынга берип турар.

2024 чылдың январьда Ляонин можуга эрткен бирги ярмарка российжи продукцияга болгаш культурага улуг сонуургалды болдурган, ынчангаш бо удаада Шэньянга эртер ярмарка Кыдатка болур ындыг хемчеглерниң эгези-дир деп, Россияның экспорт төвүнүң чиңгине директору Вероника Никишина дыңнаткан.

Россияның экспорт төвү чуруктар болгаш ойнаарактар чуруур мастер-класстар, чогаадыкчы бөлүктерниң көргүзүглери, кыдат дылда анимациялыг кинолар таныштырылгазы, амгы үениң медиа чурукчуларының ажылдарының делгелгези, орус продукция дугайында лекциялар дээш, чымыштыг культура программазын белеткээн.

Россияның экспорт төвү Кыдатка «Россияга кылган» деп үш фестиваль-ярмарканы организастап эрттиргенин демдеглээлиңер. Кыдаттың Чаа чылының бүдүүзүнде, Ляонин можунуң Шэньян биле Далянь деп улуг хоорайларынга бирги ярмарканы эрттирген. Майда Хэйлунцзян можунуң Харбин хоорайга ийи дугаар ярмарка болуп эрткен. Үшкү болуушкун ноябрьда Сычуань можунуң төвү Чэнду хоорайга болуп эрткен.

#Тывачазак #Россиягакылган #ТМГМедээлер #Тыва #Тывамедээ #Тывадыл #Тывамедиагрупп #Тува