Шериг албан-хүлээлгелиглерге эмчи болгаш психологтуг дузаны көргүзүп турар

Тываның Баштыңы Владислав Ховалыгның даалгазын күүседип, республикадан тускай шериг операциязының киржикчилеринге болгаш оларның өг-бүле кежигүннеринге эмчи дузазын көргүзериниң “ажык коридорун” ажылдаткан.

Дайынчы хөделиишкиннер девискээринден чанып келген азы шөлээде шериглерни участок база тускай мергежилдиг эмчилер ээлчег чокка хүлээп алыр. Шинчилгелерниң түңнелдери-биле «Серебрянка» санаторийге реабилитация эмнээшкининиң курузун эртип болур.

Шериг албанныгларны база оларның өг-бүлелерин деткиир республиканың каттышкан штавы тускай шериг операциязының киржикчилеринге эмчи үделгезиниң айтырыгларын хыналдага алган. Республиканың Кадык камгалал яамызының шугуму-биле көргүскен деткимчениң ол хевиринге отчетту штаб хуралдарында дыңнап турар.

Тускай шериг операциязының 64 киржикчизи республиканың 1 дугаар эмнелгезинге эмчи дузазы дээш келгенин сөөлгү хуралда дыңнаткан. Поликлиникаларга 41 кижи эмчи шинчилгезин эрткен. Арткан дайынчылар стационарга чыдып эмнеткен.

Тускай операцияның 51 киржикчизи база оларның өг-бүлелериниң 13 кежигүнү «Серебрянка» профилакторийге реабилитация эмнээшкинин алган. Алды дайынчы эмнээшкин курузун январьның 10-дан эгелээн.

Владислав Ховалыг штабтың мурнунга тускай шериг операциязының киржикчилеринге психологтуг дузаны көргүзүп, сагыш-сеткил кадыкшылын быжыглаар даалганы салган турган.

Тываның Кадык камгалал яамызы республиканың психиатрия эмнелгезиниң баазазында хереглээн кижилерге психотерапевтиниң дузазын көргүзүп турар. Бөгүнге чедир 24 кижи ол эмчиниң дузазын алган, бир өг-бүле психотерапия курузун эрткен.

Тываның психологтар ассоциациязының специалистери база психологтуг дузаны көргүзүп турар. 270 кижи дуза дилеп кирген, 38 кижи психологтуг үделгеде.

Республиканың каттышкан штавының даалгазы-биле, Тываның Күш-ажыл болгаш социал политика яамызы кадыкшыл байдалының аайы-биле шериг албан черин дооскан тускай шериг операциязының киржикчилериниң даңзызын тургузуп турар. Ол эр кижилер амгы үеде албан чериниң ажылдап кылып турары тускай шериг операциязының данчыларынга социал чаа байдалга чаңчыгар программазынга киржип болур.