Тываның Баштыңы Владислав Ховалыгның даалгазы-биле ажылчын олуттарны чепсеглээри-биле республиканың шериг комиссариадынче тускай дериг-херекселди дамчыткан.
Тускай шериг операциязының киржикчилеринден инвалид апарган шериг албан-хүлээлгелиглерни ажылче хаара тудар аргаларның бирээзи – ажылчын олуттар-биле хандырары болур.
ТР-ниң Күш-ажыл болгаш социал политика яамызы «Тыва Республикага чурттакчы чонну ажылга хаара тударын деткиири» күрүне программазы-биле иттинер-тергелиг инвалид шериг албан-хүлээлгелиглерни ажылга хаара тударынга байдалдарны тургузар талазы-биле хемчеглерни боттандырган.
Шериг комиссариаттары иттинер-тергелиг инвалид кижилерниң аай-дедир шимчээринге эптиг тускай эт-сеп болгаш ортопед сандайлар-биле кады бүрүн четчелээн компьютер комплектизин саткан. Ынчалдыр республиканың шериг комиссариаттары иттинер-тергелиг шериг албан-хүлээлгелиглерге немелде ажылдаар олуттарны ажыдар.
«Тываның Баштыңы Владислав Ховалыгның даалгазын күүседири-биле, республика бюджединден 1,8 сая рубльди тускайлааш, садыглажылгага киржип, компьютер дериг-херекселдерин, принтерни, чогуур стол-сандайларны садып алдывыс. Дайынчыларывыска таарымчалыг ажылчын олуттарны тургузуп бээри-биле, эт-септи шериг комиссариаттарында коллегаларывыска хүлээдип бердивис. Күрүневистиң болгаш республикавыстың чаагай чоруу дээш ам-даа ажылдап шыдаар дайынчыларывыска хүндүткелди көргүзүп турарывыс ол» – деп, күш-ажыл болгаш социал политика сайыды Эдуард Сандан демдеглээн.
Тускай шериг операциязының девискээринден ээп чанып келген хоочуннарны болгаш оларның өг-бүлелерин ажылга хаара тударын деткиири – регионалдыг эрге-чагырга черлериниң кол сорулгазы. ТР-ниң Чонну ажылга хаара тудар албанның ажылдакчылары, «Ада-чурт камгалакчылары» фондунуң салбырындан социал координаторлар болгаш тускай мергежилдиглер бо ажылда идепкейлиг киржип турар.
2025 чылда «Россияда ажыл» шөлдүң регионалдыг Кадрлар төвүнче ажылче хаара тударынга дуза дилеп келген тускай шериг операциязының хоочун бүрүзүнге хостуг ажылчын олуттарны дыңнаткан база профугланыышкынны киирген хууда планны ажылдап кылган. Тускай шериг операциязының 68 хоочуну (45,9 хуузу), ооң иштинде инвалид чеди кижи ооң-биле ажылды тып алганнар. Оларны тус чер чагыргаларынга, эмнелге албан черлеринге болгаш хууда компанияларда ажылдарже хаара туткан.
