Бии-Хем кожууннуң Аржаан сумузунда «Социал керээ» программазының ачызында тус черниң чурттакчылары ынак ажыл-херээн ажыдып ап, чаңгыс чер чурттугларынга ачы-дузазын көргүзүп турарлар. Оларның саны чыл келген тудум немежип турарын турарын чагырга чериниң даргазы Екатерина Тулуш дыңнаткан.
Эгелеп чоруур сайгарлыкчы үшкү разрядтың даараныкчызы мергежилдиг. Ол черле дааранырынга ынак, салгал дамчаан ус-шевер. Саяна Ооржак Чаа чылдың бүдүүзүнде культура одаанда «Сайзырал» деп дааранылга черин ажыткан. Социал деткимче алыкчызы чагыгларны хүлээп ап, аржаанчыларга каас-чараш тыва национал хептерни даарап турар.
Дааранылга черинде аскыыштарда тыва тоннар, чеңи-чоктар, бөрттер, национал аян-биле даараан хептерни аскан. Уругларга хураган кежинден тыва тонну шевер уруу Аржаана-биле кады даарап турар. Шагаа бүдүүзүнде аржаанчылардан чагыглар элээн хөй.
Ажыл-биле бот-хандыртынган сайгарлыкчы «Социал керээ» программазының акшаландырыышкыны-биле дааранырынга ажыглаар дериг-херекселдерни садып алган. Чагырга чери оран-саваны аңгылаан.
