Кызыл хоорайга болуп эрткен «Россияның күжү – чоннарның чаңгыс деминде» деп регионнар аразының II шуулганының «Үшкү сектор» семинарынга Национал школа хөгжүдер институттуң методистери Аянмаа Салчак, Чечек Сарыглар, эртем ажылдакчызы Аңчы Хомушку олар киришкенин институт дыңнаткан.
Семинарның киржикчилеринге Россия Федерациязының Хөй-ниити палатазының кежигүнү, Коммерциялыг эвес сектор хөгжүдер комиссияның даргазы Елена Тополева-Салдунова видео-харылзаа таварыштыр байыр чедирген. Семинарның программазында солун болгаш ханы уткалыг илеткелдер хөй болган, ылаңгыя Алтай Республикадан Татьяна Кончева Алтай Республиканың туристериниң кодекизин канчаар ажылдап кылганын таныштырган.
Хакас Республикадан эксперт Анна Фролованың арга-дуржулгалары дыңнакчыларга ажыктыг болган. Грантыларже киирер
төлевилелдерниң хевирлерин, сорулгазын, түңнелдери кандыг болурун херек кырында чижектер-биле бадыткап тургаш өөредилгени чоруткан.
Хакасияның Коммерциялыг эвес организацияларны удуртур төптүң төлевилелдер килдизиниң даргазы Лилия Гайдунова «Команда-биле ажыл» деп семинар-тренингини оюн технологиязы-биле эрттирген. Бодунуң чоруткан методиказының сайгарылгазын кылгаш, дыңнакчыларның санал-оналдарын дыңнаан.
Өөредилгениң түңнелинде чаа төлевилелдер бижиттинип, күрүнеден деткимче ап болур аргалар тургустунарынга бүзүрел улуг.
