Тываның А. С. Пушкин аттыг ном саңының национал болгаш чурт-шинчилел чогаалының килдизиниң ажылдакчылары Кызылдың 2 дугаар школазының 9 «а» клазының өөреникчилеринге «Тывызыксыг Тывам» деп темага хамаарыштыр айтырыг-харыыларлыг «Бодунуң оюну» деп хемчегни эрттиргенин ном саңы дыңнаткан.
Уруглар ийи аңгы «Найырал», «Эне-Сай» бөлүктер болуп алгаш, аразында мөөрейлежип ойнааннар. Ук хемчегге электроннуг таныштырылганың дузазы-биле тыва улустуң аас чогаалынга, оюннарынга, чогаалчыларның чогаалдарынга, тыва ырылар дугайында айтырыгларга харыылааннар. Олар айтырыг бүрүзүнге тодаргай харыыларны берип, идепкейлиг киришкеннер. Класстың удуртукчу башкызы Долаана Кунгаа.
База ол ышкаш Тыва чоннуң «Чинчи чажырары», «Аът чарыштырары» деп солун оюннарын ойнаан.
Уруглар башкызы-биле оюннарга улуг сонуургал-биле киржип, ажыктыг, өөредиглиг чүүлдерни билип алганы дээш четтиргенин илереткеннер.
