Тыва Республиканың Дээди Суду школачыларга экскурсияларны, хоойлу-дүрүм кичээлдерин, судтуң ажыл-чорудулгазы-биле таныштырылга хүннерин эрттирерин уламчылап турар.
Чаа өөредилге чылында Тываның кадет корпузунуң кижизиттирикчилери баштайгы аалчылар болган. Бо неделяда Тываның күрүне лицейиниң, лицей-интернаттың, Кызылдың 15 дугаар лицейиниң сески болгаш тоску класстың өөреникчилери суд системазының тургузуу, шииткекчилерниң болгаш оларның дузалакчыларының ажылы-биле таныжып, суд системазының төөгүзүнүң музейин, судтуң хуралдар эрттирер залдарын сонуургап көргеннер.
Школачыларның сонуургаан айтырыгларынга ТР-ниң Дээди Судунуң кеземче херектериниң талазы-биле суд коллегиязының даргазы Х.И. Түлүш, административтиг херектер талазы-биле суд коллегиязының шииткекчизи С.А. Железнякова, Тываның күрүне лицейиниң доозукчузу, шииткекчиниң дузалакчызы А.М. Бамба олар тодаргай харыыларны берген.
