ТР-ниң Дээди Хуралының Даргазы Кан-оол Даваа Чаа-Хөл кожууннуң Булун-Терек суурунга болгаш Шагаан-Арыг хоорайга четкен. Үнүүшкүннерниң кол сорулгазы – школаларның үндезин септелгезин хынап көөрү.
Септелге ажылдарының чорудулгазын кожууннуң, суурнуң, школаның удуртулгазы болгаш ада-иелер кирген ажылчын бөлүк-биле кады ханаан.
Булун-Терек суурда септелге хуусаа езугаар чоруп турар – сери солуттунган, ханаларны быжыглаар болгаш шывар, шаланы солуур болгаш оон-даа өске ажылдар кылдынып турар. Материалдар өй-шаанда кээп, ажылчын күш четчип турарын тудуг бригадазының удуртукчузу Ачыты Монгуш дыңнаткан.
Ажылдакчыларның хөй кезии – Булун-Теректиң чурттакчылары. Септелге үезинде кичээлдер өске социал албан черлеринде эртип турарын школаның директору Ульяна Калзан дыңнаткан.
– Школа өй-шаанда септеттингеш, Булун-Теректиң база бир каасталгазы апаар кылдыр хыналданы чоргузар бис. Өөредилге болгаш Тудуг яамылары-биле немей чугаалажыр айтырыглар бар. Чоокку үеде ажылчын хуралды эрттирерин оралдажыр бис – деп, Кан-оол Даваа школаны көргениниң соонда демдеглээн.
Социал албан черлери тударынга болгаш септээринге Булун-Теректиң чогумчалыг дуржулгазы бар дээрзин ол база немээн. Ооң мурнунда маңаа спортчу зал, чаа фельдшер-акушер пунктузу туттунган. «Чангыс демниг Россия» партияның төлевилелдериниң чорудуу-биле көдээ Культура бажыңы, школаның спорт залы септеттинген, суурже кирер оруунда дуга хевирлиг адрести тургускан.
Кан-оол Даваа улаштыр Шагаан-Арыгның үндезин септелгези эгелей берген гимназиязынга чедип, тудуг ажылдарын хынап көрген.
