Тывада «Өөредилгениң школа системазын чаартыры» программа үш дугаар чыл ажылдап турар. Ук программа езугаар сентябрь 1-ге чедир 46 көдээ школаның септелгези чоруттунарын ТР-ниң Өөредилге яамызы дыңнаткан.
– Тываның Баштыңы Владислав Ховалыг Чөөн-Хемчик база Бай-Тайга кожууннарда өөредилге албан черлериниң үндезин септелгезин хынап көрген.
Бо школаларда септелге ажылдары апрель айда эгелээн болгаш, август айның ортан үезинде төнер ужурлуг. Ийи школаның кайызында-даа шалаларын болгаш соңгаларын солаан, иштики ажылдарын кылып турар. Оран-саваларны эде кылганы-биле, санитар өрээлдер база хуралдаар залдар, аъш-чем өрээлдери немешкен.
Чылыдылга системазын болгаш суг хандырылгазын солуур ажылдар чоруп турар. Серилерин чаарткан. Дериг-херекселдерин болгаш эт-септи чагыткан бис. Чоокку үеде кээр. Хүлээникчилер керээниң хуусаазын сагыыр ужурлуг. Бо айтырыгны хүн бүрүнүң хыналдазында алган мен – деп, өөредилге сайыды Елена Хардикова демдеглээн.
Оон аңгыда Хөндергей суурда уруглар садынга четкеш, ук оран-саваны назы четпээннерниң албан черлериниң үндезин септелгезин чорудар программаже киирерин сайыт сүмелээн. Уруглар садының эргелекчизинге төлевилел-дөзевилел документилерин канчаар белеткээриниң дугайында практиктиг сүмелерни берген. Суурда 100 ажыг чаш уруглар садынче барып турар, оларга таарымчалыг байдалдарны тургузары чугула.
