Барыын-Хемчик кожууннуң өөредилге эргелели хыналда үнүүшкүннү чорутканын ТР-ниң Өөредилге яамызы дыңнаткан. Бо удаада уругларның дыштанылгазын организастаанынга хамаарыштыр ажыл-чорудулганы үнелеп көрген.
Хыналда үнүүшкүннүң кол сорулгазы – айыыл чок чоруктуң негелделери күүсеттингенин, аъш-чемниң шынарын, хемчеглерни чорудуп турары база ниитизи-биле лагерьде уругларның хостуг үезин чөптүг организастап турары.
Дыштанылга сезону эгелээнден бээр өөредилге эргелелиниң ажылдакчылары хыналдаларны удаа-дараа чоруткулаан. Кол кичээнгейни назы четпээннерниң кадыкшылын камгалаары, оран-саваның санитарлыг байдалы, персоналдың квалификациязынче база чугула херек дериг-херекселдер-биле хандырттынганынче углап турар.
«Лагерьде уруглар таарымчалыг байдалда дыштанып, шынарлыг аъш-чемни чип, солун оюн-тоглаада киржип турарын херек кырында бадыткап көөрү чугула» – деп, кожууннуң өөредилге эргелелиниң начальниги дыңнадып турар.
Өөредилге эргелелиниң ажылдакчылары уруглар база кижизидикчи башкылар-биле чугаалажып, оларның күзелдерин дыңнаан.
Хыналда үнүүшкүннер уругларның дыштанылгазынга хамаарыштыр программа боттанып турар үеде, чай дургузунда, уламчылаар. Хыналдаларның түңнели-биле чайгы лагерьлерниң байдалы билдинип келир, ооң-биле чергелештир өөредилге организацияларының удуртукчуларынга сүмелерни кылыр.
