Республика хүнүнге болгаш Тываның малчыннар Наадымынга тураскааткан тыва хөл-шыдыраа маргылдаазы дүүн,чаңгыс хүн иштинде швейцар система-биле болуп эрткен.
Наадымның хөл-шыдыраага тулган чемпионнарның болгаш 3-кү черге чедир шаңналдыг чер алган эр-даа,херээжен-даа улус аразынга шаңналдары дөмей,дыка шыырак болган.
Бирги черни алган Артыш Чүлдүм биле Шуру Ондар хүндүлүг бижиктер,алдын медальдар,чемпион коржаалар болгаш 30-30 муң акша шаңналдарын чаалап алганнар.Ийиги черге төлептиг болган Эдуард Ховалыг биле Динара Хомушкуга хүндүлүг бижиктер,мөңгүн медальдар болгаш 20-20 муң акша шаңналдарын тывыскан.Үшкү шаңналдыг черже кирген Херел Сандай-оол биле Норжуң Монгушка база хүндүлүг бижиктерни,хүлер медальдарны болгаш 10-10 муң акша шаңналдарын Тываның спорт яамызының оралакчы сайыды Саян Монгуш тывыскан.
Шыдыраа маргылдаазының ажыдыышкынынга-даа,шаңнал-мактал тыпсыр кезээнге-даа Тываның спорт яамызының оралакчы сайыды боду кээп,шыдыраачыларга байыр чедирип,спортчуларны хүндүлээни кончуг эки болган.
Тываның спорт яамызының хөл-шыдыраа маргылдаазынче шаңнал кылдыр үндүрген акша-төгерии бо удаада дыка шыырак болган.
Үстүнде ады кирген,шаңнал алган шыдыраачылардан аңгыда 4-5-ки черлер алган киржикчилерни болгаш элээди оолдар болгаш хоочуннар аразынга шылгараан ойнакчыларны база хүндүлүг бижиктер-биле демдеглээн.
Олар кымнарыл дээрге:
-4 дугаар чер алган Долаан Салчак биле Сайлык Самбуу,
-5 дугаар болган Ужар Монгуш биле Арина Иргит,
-55 хардан өрү назылыг хоочуннар аразынга 1-2-3 дугаар болган Орлан Сарыглар,Олег Дамбиев,Валерий Куулар,
-элээди оолдар аразынга 1-2-3 дугаар черни ээлээн Начын Чамзы,Эчис Саая,Александр Куулар болганнар.
Бо шыдыраачыларга хүндүлүг бижиктерден аңгыда,холун актаптар акша шаңналдарын тывыспайн барганы арай хомуданчыг болган.
Ниити түңү 120 муң болган акша шаңналынының хөй эвес-таа болза,кезик-чамдыын база-ла хүндүлүг бижиктер тыпсып демдеглээн шыдыраачыларга база чедиштирипкен болза кончуг эки болур турган.
Ол дугайында,хоочун шыдыраачылар база оралакчы сайыт Саян Александрович Монгушка маргылдаа соонда чугаалаан,удуртукчу ону хүлээп алган.
Ниитизи-биле 2022 чылдың Наадымының тыва хөл-шыдыраа маргылдаазынга 64 эр,16 херээжен шыдыраачылар киришкен.
Мерген КЫРГЫС
"ТываМедиаБөлүк" информастыг агентилелдиң чуруктары
