ТР-ниң Дээди Хуралының Даргазы Каң-оол Даваа баштаан депутаттар Мөңгүн-Тайга кожуунда сарлыкчылар фестивалынга киржип, байырын чедирген.
Байырлал бо чылын делегей чергелиг эрге-байдалдыг эртип турар. Аңаа киржири-биле Моолдуң сарлыкчылары база моорлап келген.
– Сарлыкты тайга черивис чараш, чоргаар малы деп алгап-йөрээп чоруур бис. Ооң берип чоруур сүүзүннүг сүдүн, өремезин, саржаан болгаш эъдин чивээн кижи республикада чок деп болур. «Мөген-Бүрен» көдээ ажыл-агыйы сарлык эъдин болбаазырадып, чурттакчыларга садып турары өөрүнчүг.
Сөөлгү ийи чылда Тывага, ооң иштинде Мөңгүн-Тайгага бүдүрген какпактаан эътти, алгы-кешти база өске-даа продукцияны тускай шериг операцияда киржип турар маадырлыг дайынчы чаңгыс чер чурттугларывысче чорудуп турар бис. Тыва чем оларны күш киирип, хей-аъдын болгаш сүлдезин бедидип турар – Кан-оол Даваа чугаалаан.
Сарлык малды азыраар талазы-биле эртем-практиктиг конференцияның хралынга Кан-оол Даваа, комитет даргазы Ульяна Монгуш, депутат Сергей Куулар киржип, парламент шаңналдарын шылгараан мөңгүн-тайгажыларга тывыскан.
– Тускай эртемниглерниң болгаш сарлык азырап чоруур араттарывыстың санал-оналдары болгаш үнелиг арга-дуржулгазы бо малывысты өстүреринге өмек-дөмек болур деп билир бис – дээш, сүлдези бедик, «мөңгүн» черниң чурттакчыларынга, ылаңгыя сарлыкчыларга, фестивальдың киржикчилеринге болгаш аалчыларынга Дээди Хурал Даргазы чедиишкиннерни күзээн.
Бо чылын сарлык болгаш сарлыкчылар байырлалын Тыва Арат Республиканың ССРЭ-ниң составынче киргенинден бээр 80 чыл оюнга болгаш Россия Федерациязының база Тыва Республиканың көдээ ажыл-агыйының алдарлыг ажылдакчызы, Тыва Республиканың Күш-ажылдың Маадыры Өшкү-Саар Ооржактың 80 харлаанынга тураскаадып демдеглеп эрттирип турарын сагындыраал.
