Сибирь федералдыг округтуң регионнарында эпизоотиктиг байдалды сайгарган

Россия Федерациязының Көдээ ажыл-агый болгаш аъш-чем яамызының ветеринария департаментизиниң директорунуң оралакчызы Андрей Муковнин база ТР-ниң Чазак Даргазының оралакчызының хүлээлгезин күүседип турар Уран-оол Ондарның кады башкарылгазы-биле Красноярск крайда, Хакас Республикада болгаш Тыва Республикада эпизоотиктиг байдалды болгаш күрүнениң ветеринария албанының ажыл-чорудулгазының үре-түңнелин бедидер талазы-биле хурал болуп эрткен.

РФ-тиң Президентизиниң Сибирь федералдыг округда бүрүн эргелиг төлээзиниң Администрациязының экономиктиг болгаш социал политика талазы-биле департаментизиниң чөвүлекчизи Валентина Болдырева, Тыва Республика талазы-биле кол федералдыг инспектор Александр Вавилихин, ол ышкаш Тыва Республикада Россельхознадзорнуң девискээр эргелелиниң, Роспотребнадзор эргелелиниң, Россияның федералдыг айыыл чок албанының Тывада кызыгаар эргелелиниң, Красноярск крайның, Хакасияның база Тываның ветеринарлыг албан черлериниң удуртукчулары база хуралга киришкен.

ТР-ниң Чазак Даргазының оралакчызының хүлээлгезин күүседип турар Уран-оол Ондар республиканың ветеринария албанының 95 чыл оюнда болуп турар федералдыг деңнелдиг хурал ооң хөгжүлдезинге улуг ужур-дузалыг болгаш кожа-хелбээ субъектилерниң албан черлер аразында сырый ажыл-агыйжы харылзааны тургузарынга дузалаар деп демдеглээн.

РФ-тиң Көдээ ажыл-агый болгаш аъш-чем яамызының ветеринария департаментизиниң директорунуң оралакчызы Андрей Муковнин эпизоотика талазы-биле таарымча чок кожа-хелбээ девискээрлерден айыылдыг мал аарыгларын киирер болгаш нептередиир айыылдардан кожа-хелбээ регионнарга кызыгаар девискээр болуп турар республиканың ветеринария албанын күштелдирери негеттинип келгени-биле Тывага шак ындыг ужуражылганы эрттирер дугайында шиитпирни хүлээп алганын демдеглээн.

Кызыгаар регионнарда амгы эпизоотиктиг байдалды, ында ветеринария албанының хөгжүдериниң деңнелин чыылганнар чугаалашкан. Тыва Республиканың Ветеринария албанының начальнигиниң хүлээлгезин күүседип турар Ай-кыс Ооржактың дыңнатканы-биле алырга, регионда эпизоотиктиг байдал турум. Бо чылдың эгезинден бээр мал-маганның халдавырлыг аарыглары бүрүткеттинмээн.

Тываның Баштыңы Владислав Ховалыгның эгелээшкини езугаар, РФ-тиң Көдээ ажыл-агый болгаш аъш-чем яамызының деткимчези база РФ-тиң Саң-хөө яамызының чөпшээрешкени-биле, 2025 чылдың апрель 1-ден эгелеп албанның штат санын 148 кижиге көвүдеткен. Албан чериниң ажылдакчыларының саны 474 чедир өскен (45 хуу), ооң иштинде 233 мал эмчилери, 117 ветфельдшерлер база 23 ветлаборантылар апаар, бөгүнде ында 122 кижи ажылдап турар, 36 олут хостуг.

База ол ышкаш Хакас Республиканың ветеринария эргелелиниң начальниги Евгений Баулин база Красноярск крайның ветеринарлыг хайгаарал албанының удуртукчузу Сергей Москаленко боттарының удурткан девискээрлеринде эпизоотиктиг байдал дугайында медээлерни берген.

Оон аңгыда хуралдың киржикчилери Роскөдээажыл-агыйхайгааралдың Хакасия болгаш Тыва Республикалар талазы-биле эргелелиниң начальнигиниң хүлээлгезин күүседип турар Геннадий Ульчугачевтиң хыналда-хайгаарал ажыл-чорудулгазы болгаш мал-маганны чөпшээрел чок сөөртүрүн болдурбазы-биле алдынган хемчеглер дугайында илеткээннер. Регионнар аразынга мал-маганның чөпшээрел чок сөөртүлгези онза айыылдыг халдавырлыг мал аарыгларын киир сөөртүрүнге кол чылдагаан болур дээрзин инспектор айыткан.

Ужуражылга соонда киржикчилер элээн каш санал-оналдарны болгаш даалгаларны чыып тургускан. Ылаңгыя, Россия Федерациязының Көдээ ажыл-агый болгаш аъш-чем яамызының деңнелинге шиитпирлээр айтырыглар даңзызынче Тываның ветеринария лабораториязының материал-техниктиг баазазын быжыглаар, Тыва Республиканың ветеринария албанының күрүне албан хаакчыларның санын көвүдедир дээш, өске-даа чугула айтырыгларны киирерин тодараткан.