Каа-Хем кожуунда мал чемин белеткээр кампания хем бажының суурларындан эгелээрин чагырга чери дыңнаткан.
Сизим болгаш Эржейде сиген кезилдези дооступ турар. Сизим суунуң хууда дузалал ажыл-агыйлары 150 тонна хире сигенни белеткеп алган. Мал чемин четчири-биле белеткеп алыр дээш, аяс-кааң хүн бүрүзүнде сигенчилер кызымак ажылдап турар.
Тываның Баштыңы Владислав Ховалыг мал чемин эртежик белеткеп эгелээн тудум, кышты хүр-менди ажып эртериниң магадылалы бар дээрзин демдеглээн.
Тывада мал чеминиң белеткелиниң талазы-биле оперативтиг штаб ажылын эгелээнин сагындыраал. Эрткен кыш чер болгаш мал ажылдыгларга амыр эвес болганы-биле суму бүрүзүнде сиген кезер бригадаларны тургускан. Кожуун бүрүзү сиген курлавырын харыылаар ужурлуг.
