Тывада өскүс уругларның тускай чуртталга фондузунуң чурттаар оран-савазын хынаар албан черлер аразының ончалал комиссиязын тургускан. Күрүнеден социал хөлезилелге чурттаар оран-сава алган өскүс кижи бүрүзүнге чедип, хоойлу езугаар оларның ээлериниң эрге-ажыы хажыттынмаанын, бажыңын ажыглаарынга кым-даа шаптыктавайн турарын хынап, ооң ээлериниң амыдырал-чуртталга байдалы экижип келгенин хынаары – комиссияның кол сорулгазы.
Тываның Чер болгаш өнчү-хөреңги яамызының ажылдакчылары өскүс болгаш ада-иезиниң азыралы чок арткан уругларга берген оран-саваны хынап көргенин албан чери дыңнаткан.
Ажылчын бөлүк ТР-ниң Өөредилге яамызы-биле Тес-Хем кожуунда 81 чуртталга бажыңын хынаан. 47 өскүс уруг бажыңнарында чурттап турар болган. 30 кижи чөптүг чылдагаан-биле чурттап турар черинге турбаан. Социал хөлезилел керээзиниң негелделерин хажыдып, ийи кижи бажыңнарында чурттавайн турар, ийизи хөлезиге оран-савазын дужаап турары илерээн.
Хыналданың түңнелдери-биле акт тургустунган, ында илереттинген хажыдыышкыннарны айыткан, оларны чайладырының талазы-биле сүмелерни киирген.
Комиссия ончалал ажылын чорудуп тургаш, хөлезиде алган бажыңнарының документилеринге, коммунал ачы-дуза дээш төлевирлер болгаш оран-саваларны ажыглалының талазы-биле тургустунган айтырыгларны чурумчудар. Ылаңгыя чурттакчылар-биле социал хөлезилел керээни тургусканының шынныын, ээлериниң чуртталга дүрүмнерин сагып турарын хынап, өскүс уруглар-биле чурттап турар кижилерниң даңзызын тодарадыр. Бажыңны хөлезилеп турар харыысалгалыг кижилер 5 чыл чурттаан соонда, социал чуртталга бажыңын хуужудуп алыр эргези барын тайылбырлаар.
Ажаалда-тежээлде болгаш харагалзал ажыл-чорудулгазын хайгаарап турар комиссияны Тываның өөредилге сайыдының оралакчызы удуртурун томуйлаан. Комиссияның составында ТР-ниң Өөредилге яамызының төлээлеринден аңгыда, Тудуг, Чер болгаш өнчү яамыларындан, тус чер чагырга органнарындан тускай мергежилдиглер кирип турар.
