Бии-Хем кожууннуң Аржаан сумузунуң девискээринге, Аныяктар хүнүнге тураскааткан, республика чергелиг аът чарыжы биле хүреш маргылдаазы 12 чыл дургузунда эртип турары бо. Бо удаада адаан-мөөрейни Тарлаг сумузунуң чагырга чери малчыннарының деткимчези-биле эрттирген.
Беш салыглыг аът чарыжының түңнелдерин эрттирикчилер дыңнаткан.
Чарыш аъды салыр маргылдааны богбалардан эгелээн. Ук чарышка бирги черни Чеди-Хөлден Дмитрий Оюннуң калдар богбазы чаалап эккелген.
Чоруктуг чаваалар чарыжынга баштайгы байзаны Ак-Талдан Аян Чалзаптың кара аъды алган. Аныяк чүгүрүк аъттар: Каа-Хем кожуундан Валентин Давааның доруг аъды. Улуг чоруктуг аъттар: Сукпактан Буян Монгуштуң доруг аъды.
Улуг чүгүрүк аъттар чарыжынга баштайгы байзаны Эрзинден Сергей Ынаалайның калчан-доруг аъды чаалап эккелген. Тиилекчиге мотоциклди тывыскан.
«Кыштаг» төлевилелиниң 2017 чылдың киржикчизи Андриан Шивит-оол биле 2019 чылдың киржикчизи Ренат Байкара олар база деткикчилерниң санында. Бирги черлер алган малдарның ээлерин богбалар-биле шаңнаан.
Хүрешке сегиржип алыышкыннарның түңнелинде Барыын-Хемчиктен Шалбачы Күжүгет шүглүп үнген, Тес-Хемден Очур Намдан үжүүрлешкен.
Тарлаг сумузунуң хууда сайгарлыкчызы, көдээ ажыл-агый бүдүрүлгезиниң удуртукчузу Айдың Соскал шүглүп үнген мөгени (шаңналы – шары) деткээн. Үжүүр былаашкан мөгеге телевизорну, үшкү-дөрткү черлерже кирген мөгелерге өртектиг белектерни тывыскан.
Аржаан сумузунуң чагырга чериниң удуртулгазы аът чарыжы болгаш хүреш маргылдаазының деткикчилери – Тарлаг сумузунуң малчыннарынга, «Кыштаг» төлевилелиниң киржикчилеринге четтиргенин илереткен.
#Бии_хемкожуун #Аржаан #Тарлаг #Хүреш #Аътчарыжы #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
