«Социал бүдүрүлгелерниң» чаңгыс аай даңзызын хевирлеп турар

ТР-ниң Экономиктиг хөгжүлде болгаш үлетпүр яамызы биче болгаш ортумак сайгарлыкчы чорук субъектилерин «социал бүдүрүлгелер» деп хүлээп көөрүнге херек документилер хүлээп алыышкынын эгелээн. 2023 чылда «социал бүдүрүлгелерниң» чаңгыс аай даңзызын хевирлээр ажыл регионда чоруп турар.

Социал сайгарлыкчы чорук – хамаатыларның болгаш ниитилелдиң социал айтырыгларын шиитпирлежиринге дузалажып, ниитилелге ажыктыг сорулгаларны чедип алырынче угланган бизнес болур.

“Социал бүдүрүлге” деп эрге-байдалдыг хуу сайгарлыкчылар болгаш организациялар күрүнениң талазындан тускай деткимчеге ынанып болур. Оларга субсидиялар болгаш грантыларны, тускайжыттынган өөредилге программаларын, чээли алырынга база күрүне болгаш муниципалдыг өнчү-хөреңги хөлезилеп алырынга чиигелделерни бээр.

Даңзыже кирген сайгарлыкчыларга “Биче болгаш ортумак сайгарлыкчы чорук база хуу сайгарлыкчы эгелээшкинни деткиири” национал төлевилелде көрдүнген саң-хөө деткимчезин – чылда үш сая 30 муң рубльди бээр. Республиканың чеди сайгарлыкчызы ону ажыглап болур.

«Социал сайгарлыкчы» эрге-байдалды алырда, даңзыга турары албан, ынчангаш негелделерниң оода бирээзинге дүгжүп турар ужурлуг. Ол эргеже кордап турар хуу сайгырлыкчы азы организация чурттакчы чоннуң социал байдалы чегей кезиин, чижээ, харык-шинээ кызыгаарлыг хамаатыларны, бот азы хөй ажы-төлдү ада-иелерни, пенсионерлерни, дескен кижилерни, эвээш орулгалыг хаматыларны күш-ажылче хаара тударын хандырар ужурлуг. Оларның үлүү ажылдакчыларының чартыы хире, а күш-ажыл төлевиринче 25 хуудан хөй чарыгдалды үндүрер.

Оон аңгыда чурттакчы чоннуң социал байдалы чегей кезиинде хамаатыларның бүдүрген барааннарын садып база ачы-дузаларын боттандырып турар сайгарлыкчыны «социал» деп санаар.

Эң сөөлгү сан-чурагайлардан алырга, Тывада албан ёзузу-биле бүрүткеткен биче болгаш ортумак сйагырлыкчы чорук субъектилериниң чүгле 9-зу социал ажыл-чорудулгалыг. Пөс-таавы кылыгларын бүдүрүп турар “Кызылдың өөредилге-бүдүрүлгелиг бүдүрүлге” кызыгаарлаан харыысалгалыг ниитилел ооң санында.

2022 чылда бүдүрүлгениң коллективинде ажылдап турар 32 кижиниң 27-зи ол бөлүкке хамааржыр болган. Оларның санында 18 харык-шинээ кызыгаарлыг хамааты, сес пенсионер база бир бот-ие бар. Күш-ажыл төлевириниң ниити фондузундан 79 хууну ол ажылдакчыларның шалың төлевиринче чарыгдап турар. Бүдүрүлгениң күш-ажыл чорудуунга киржир кылдыр кадыкшылының байдалы харык-шинээ кызыгаарлыг кижилерге онза байдалдарны тургускан.

“Социал бүдүрүлге” эрге-байдалды алыксаан хуу сайгарлыкчылар база юридиктиг черлер чогуур билдириишкинни база доктааткан үлегерде хевирни долдургаш, 2023 чылдың декабрь 29-ка чедир ону киирерин, республиканың Экономиктиг хөгжүлде болгаш үлетпүр яамызы дыңнаткан.

Билдириишкиннерни бир ай иштинде сайгарып көөр, ол үеде тускай мергежилдиглер берген медээлерниң шынныын хынаар. Тодаргай медээни бо телефоннардан билип ап болур: 8(39422) 9-76-40, 9-76-51.