Күрүне деткимчези тускай шериг операциязының хоочуннарынга боттарының ажыл-херээн ажыдарынга дузалап турар. Бо чылдың эгезинден бээр тускай шериг операциязының 42 хоочуну Социал керээге үндезилээн күрүне деткимчези-биле «Хууда сайгарлыкчы ажыл-чорудулганы боттандырары» угланыышкында мөөрей шилилгезин чедиишкинниг эрткен.
Кижи бүрүзү боттарының бизнезин ажыдарынга азы сайзырадырынга 350 000 рубль түңнүг саң-хөө деткимчезин алган. «Өг-бүле» национал төлевилели-биле хамаатыларга көрдүнген социал керээ – күрүнениң деткимче хемчеглери амыдыралдың берге байдалынга таварышкан кижилерниң амыдырал-чуртталгазының шынарын экижидер сорулгалыг.
«Россияда ажыл» регионалдыг кадрлар төвүнүң демдеглээни-биле алырга, хемчегже дайынчы хөделиишкиннер хоочуннарын хөйү-биле хаара тудар дээш, тускай шериг операциязының киржикчилеринге өг-бүлениң орулгазын көрбес кылдыр социал керээни чарарының бөдүүнчүткен негелдезин киирген.
«Социал керээ” программазының киржикчизи Леонид Ховалыгныӊ ажыл-ижи – чедиишкинниг старттыӊ бир чижээ. Ол 2022 чылда Сахалин облазынга шериг керээзин чаргаш, дайынчы хөделиишкиннер девискээринче аъттанган. Албан хүлээлгезин эрттирип тургаш, ол аар кемдээшкинни алгаш, үшкү бөлүктүң инвалиди болган.
Тускай шериг операциязының девискээринден чанып келгеш, хамааты амыдыралга катап чаңчыгар ужурга таварышкан. Шагдагы-ла күзели – бодунуң ыяш дилдирер бүдүрүлгезин ажыдары. Ол “Ада-чурттуң камгалакчылары” күрүне фондузунче болгаш ТР-ниң «Россияда ажыл» кадрлар төвүнге дуза болгаш деткимче дилеп, билдириишкинни киирген.
Кадрлар төвүнүң тускай мергежилдиглери Леонид Ховалыгга бизнес-планны тургузарындан эгелээш, комиссия эртеринге чедир бүгү талалыг дузаны көргүскен. Тускай шериг операциязының хоочуну бодунуң төлевилелин чедиишкинниг камгалааш, субсидия акшазы-биле ыяш дилдирер дериг-херекселдерни садып алган.
Амгы үеде Леонид Ховалыгның бүдүрүлгези бирги чагыын доозуп турар. «Ажылымга таарзындым. Күзелимни боттандырарынга болгаш чуртталгамның чаа эгезин эгелээринге дузалаан күрүне деткимчези дээш өөрүп четтирдим» – деп, ол өөрүшкүзүн үлешкен.
Күрүне деткимчезиниң алыкчызы кышкы соок эгелээриниң мурнунда одаар ыяш чедирилгезин организастап, тускай шериг операциязының киржикчилериниң өг-бүлелеринге ачы-дузазын көргүзер деп планнаан.
