Эрткен чылдың төнчүзүнде Өөк сумузунда хеп даараар черни аныяк шевер Аллен Айлин ажыткан. Ол социал керээге үндезилээн күрүне деткимчези-биле дааранырынга херек дериг-херекселди садып алган.
Чагыглар езугаар хеп даараарындан аңгыда хевин септедир, эде даарадыр дээш улус хөйү-биле кээп турар. Оран-савазы сумунуң клувунда. Шагаа таварыштыр тыва национал хеп даарадыр дээн күзелдиг улустуң саны каш катап көвүдеп келген.
Аллен Айлинниң ус-шевер кырган-авазы уйнуун бичиизинден тура дааранырынга өөредип турган. Аныяк шевер ««Демография» национал төлевилелдиң «Ажылче хаара тударынга деткимче» федералдыг программа-биле Кызылга дарааныкчы мергежилди база шиңгээдип алган.
Республикада күрүне деткимчезин алгаш, хууда ажыл-херээн ажыдып ап, ажыл-биле бот-хандыртынган кижилерниң саны немежип турар.
