Ак-Довурак хоорайдан «Социал керээ» программазының киржикчизи Аюжана Ондар «Соля Вита» дустуг өрээлди ажытканын чагырга чери дыңнаткан.
Социал деткимче алыкчызы эрткен чылын чурттап турар чериниң аайы-биле Чонну ажылга хаара тудар төпче ук программага киржир дээш, документилерин дужааган турган. Күрүне деткимчези-биле «Гранит» бизнес-төвүнде оран-сваны хөлезиге ап, ханаларын «дус-биле» шып, тускай дериглер-херекселди садып алган.
Аюжана Ондар «дустуг куйну» бойдустуң таарымчалыг агаары-биле долдурар галогенераторну тургузуп, чаңгыс чер чурттугларының кадыкшылын быжыктырар ажыктыг ажыл-херээн боттандырып эгелээн. Өрээлдиң агаары микробтар, аллергеннер болгаш доозундан арыглаттынган. Уругларга оюн-тоглаа булуңун база аңгылаан.
Дустуг блоктар-биле шыптынган «дустуг куйга» кирген бир сеансты далай кыдыынга үш хонук дыштанганынга эксперттер деңнеп турар. Таарымчалыг температура болгаш дустуң кезекчигештери сиңген агаар кижиге эки салдарлыг.
«Дустуг куй» кижиниң ниити кадыкшылын быжыглаарынче угланган эмнээшкин өрээли. Тыныш органнарының аарыгларын эмнээринге дузалыг. Ук өрээлче кирер бетинде эмчиниң тайылбыр-сүмезин алыры артык эвес.
