Бии-Хем кожууннуң Аржаан сумузунда социал керээге үндезилээн күрүне деткимчезиниң ачызында хууда ажыл-херээн ажыдып ап турар улустарның саны немежип турарын чагырга чери дыңнаткан.
Екатерина Ховалыг баш таарар салонну ажыдып, чаңгыс чер чурттугларынга таарымчалыг байдалдарны тургускан. Оран-саваны чурттап турар бажыңының девискээринде боттарының күжү-биле тудуп алган.
Хөй ажы-төлдүг эгелеп чоруур сайгарлыкчы сумунуң үлегерлиг аваларының бирээзи. Ооң мурнунда баш таарыкчызы дооскан мергежилиниң аайы-биле Кызылдың чараштаныр салоннарынга шаңнал-макталдыг ажылдап турган. Ам ол бодунуң күзелин амыдыралда боттандырган.
Сумуда күрүне деткимчезиниң ачызында хууда дузалал ажыл-агыйын ажыдып ап турарлар база бар. Ажыл-херээн, хууда дузалал ажыл-агый ажыдып алыр күзелдиг улус чурттап турар чериниң аайы-биле Чонну ажылга хаара төпке билдириишкинни киирип болурун сагындыраал.
