Үстүү-Хүрээ-2024: Софья Кара-оол болгаш «Тыва Джаз Бэнд»

Дириг хөгжүмнүң болгаш чүдүлгениң делегей чергелиг «Үстүү-Хүрээ» фестивалын дөрт чыл үзүктелиишкин соонда, бо чылын, Тываның Баштыңы Владислав Ховалыгның шиитпири езугаар катап база эрттирер болган.

Чадаана хоорайга июль 9-11 хүннеринде «Үстүү-Хүрээ» фестивалы болуп эртерин сагындыраал. Аңаа бистиң чурттуң аңгы-аңгы булуңнарындан артистер киржир. Ооң ат-сураглыг киржикчилериниң аразында – Софья Кара-оол болгаш «Тыва Джаз Бэнд».

Тываның Культура яамызының медээзи-биле алырга, “Тыва Джаз Бэндиниң” хөгжүмчүлери – езулуг профессионалдар, Чөөн Сибирьде культура болгаш уран чүүл академиязында Тыва Республиканың уран чүүлүнүң алдарлыг ажылдакчызы, үрер хөгжүм херекселдери кафедразының доцентизи Петр Казимирниң (Красноярск) болгаш эстрада уран чүүлү кафедразының эргелекчизи, профессор, РФ-тиң болгаш Бурят Республиканың уран чүүлүнүң алдарлыг ажылдакчызы, саксофончу, флейтажы, делегей, бүгү россияның, регионнар аразының мөөрейлериниң шаңналдарының эдилекчизи Валерий Симоновтуң клазының доозукчулары бар.

Кол дирижер – Тываның алдарлыг артизи Начын Донгак.
Коллективтиң репертуары доктаамал чаарттынып турар. Ында композитор Владимир Токаның джаз чогаадыглары, Игорь Дулуштуң эде ажылдааны болгаш эде аянчытканы-биле тыва улустуң ырылары бар. Коллективтиң ыраажызы Тываның улустуң артизи Софья Кара-оол “бэндиниң” бүгү төлевилелдеринде киржип турар. Ооң күүселдезинде джаз өткүт, чараш, күштүг дыңналыр.

Бодунуң тургустунган үезиниң дургузунда «Тыва Джаз Бэнд» джаз делегейинде сураглыг хөгжүмчүлер-биле: Россияның улустуң артизи Игорь Бутман, Алвон Джонсон (гитара, вокал (АКШ), Владимир Толкачев – (саксофончу, Новосибирск), Петр Казимир (труба, Красноярск) болгаш өскелер-биле-даа чаңгыс сценага ойнап турган.

2023 чылда «Тыва Джаз Бэнд» Москвага болган “Триумф Джаза» деп, а ол ышкаш “Енисей кырында джаз” база «Sochi Jazz Festival» фестивальдарга чедиишкинниг киришкен.