Өвүр кожууннуң Хандагайтының спорт школазында 2006-2018 чылдарда төрүттүнген оолдар аразында кожуун чергелиг тыва хүреш маргылдаазы болуп эрткенин чагырга чери дыңнаткан.
Маргылдааның эрттирикчилери – республиканың кол суд приставы Омак Достай болгаш суд приставтарында ажылдап турар тус черниң чурттакчылары.
Өвүр кожууннуң удуртулгазының мурнундан кожуун баштыңы Анай-Хаак Лопсан-Серен хүрештиң деткикчилеринге Өөрүп четтириишкин бижиктерин тывыскан.
Байырлыг ажыдыышкынга Хандагайтының уругларның уран чүүл школазының башкылары болгаш культура ажылдакчылары хөгжүмнүг байырны чедирген. Спорт школаның болгаш суурларда тренер башкылар хүрешти демнежип эрттиришкеннер.
– Тыва хүрешти сайзырадып, бичии мөгелерниң арга-дуржулгазынга деткимчени берип, оларның хүрешке сонуургалын күштелдирип, эки шаңналдарлыг маргылдааны эрттирген Омак Степановичиге болгаш суд приставтарында ажылдап турар чаңгыс чер чурттугларывыска четтиргенивис илереттивис – деп, кожуун баштыңы чугаалаан.
Республика-даа, кожуун-даа чергелиг хүреш маргылдааларынга шаңналдыг черлерден дүшпейн турар бичии мөгелерге өвүржүлер чоргаарланып чоруурлар.
