Сүт-Хөл кожууннуң төвү Суг-Аксында хууда аалчылар бажыңын байырлыг байдалга ажытканын чагырга чери дыңнаткан.
Аныяк сайгарлыкчы Арзылаң Монгуштуң өг-бүлези боттарының күжү-биле оран-саваны тудуп алган. Делгем, чылыг-чырык, изиг-соок суглуг, чаа эт-сеп дериттинген, дыштанырынга бүгү таарымчалыг байдалдар тургустунган аалчылар бажыңы эжиин ажыткан. Кожууннуң удуртулгазы Монгуштарның өг-бүлезинге байыр чедирген.
Беш ажы-төлдүг өг-бүлениң ээзи, 2018 чылдан эгелеп сайгарлыкчы ажыл-чорудулгазын эгелээн. Чажындан ажыл-ишке өөренген, эртем-билиглиг, алызындан уран-шевер, кызымаккай аныяк өг-бүле эгезинде боттарының чурттаар оран-савазын тудуп дооскаш, 2018 чылдан тура бажың иштиниң эт- севин кылыр цехти кожуунга ажыткан.
Бо хүннерде Монгуштар ажыл-ижин шуудадып, республиканың болгаш кожууннуң чонунга, албан черлеринге чагыг езугаар эт-септи шынарлыы-биле кылып, оларның хереглелин хандырып, үре-түңнелдиг ажылдап турар.
Ажыл-херээн улам сайзырадыры дээш сагынгыр-тывынгыр өг-бүле, ийи чыл бурунгаар, аалчылар бажыңының кожуунда хереглелиниң улуун өөренип көргеш, ажыдарын шиитпирлеп алган.
Арзылан Монгуш тудуг, шеверлел, каңнаар, электри болгаш эптээшкин дээш шупту ажылдарын боду кылып билир. Ооң эң-не кол дузалакчылары – өөнүң ишти Долгар Викторовна болгаш ажы-төлү.
Долгар Монгуш суд системазында хөй чылдарда ажылдап турар. Ол хостуг үезин өг-бүлезиниң ээзинге деткимче көргүзеринге болгаш ажы-төлүн төлептиг, ажыл-ишчи кижилер кылдыр кижизидеринге тураскаадып чоруур. Уруглары чажындан эрес-кежээ болуп, өдээнде тудуп турар мал-маганын малдаарынга, чайгы уеде ногаа-чимис өстүреринге дээш боттарының назы- харының аайы-биле шыдаар ажылдарынга шуптузунга дузалажып турар.
Шеверниң кылган эт-севи-биле дериттинген, дыка улуг эвес үш өрээлге, ийи- ийи аалчы боттарының бажыңында дег дыштанып ап болур.
