Бүгү делегейниӊ Хөөмей академиязы Чилиниң Араукания (мапуче деп үндезин чоннуң Чилиде чурттап турар девискээри) провинциязының Темуко хоорайынга Американың болгаш делегейниң үндезин чоннары-биле шинчилел кылыр ассоциацияның конференциязы июль 21-25 хүннеринде болуп эрткенин дыңнаткан. Ук хемчег 2007 чылдан эгелеп эртип турар, делегейде үндезин чоннарга хамаарышкан эң кол болгаш хөй киржикчилиг эртем конференциязы болуп турар.
Конференцияның кол угланыышкыны – үндезин чоннарны деткиир, ынчангаш киржикчилерниң хөй кезии үндезин чоннарның төлээлекчилери – эртемденнер, университеттерниң үндезин чоннар-биле ажылдаар салбырларның ажылдакчылары, улуг назылыг чонунуң төөгүзүн, уран-чүүлүн сонуургааннар болур. Бо чылдың темазы – Сактыышкын, чер-девискээр болгаш шимчээшкиннер. Ниитизи биле 281 секцияга 600 ажыг шинчилекчи киришкен.
"Indigenous Eco-Acoustemologies: Sound and Voice as Practices of More-than-human Relationality" секцияны бистиң даштыкыда чурттап чоруур чаңгыс чер чурттуувус, Финляндияда Хельсинкиниң университединиң үндезин чоннар эртемнериниң эртем ажылдакчызы, Японияның Тохоку университединиң Мурнуу-Чөөн Азия эртемнериниң төвүнүң эртем ажылдакчызы, доктор Виктория Пээмот удуртуп эрттирген.
Конференцияның ажылынга Бүгү делегейниӊ Хөөмей академиязының шинчилекчизи Чодураа Тумат «Төрээн черимниң үннери: игилдиң тыва көшкүн чуртталга-биле харылзаазы» деп видеоилеткели-биле киришкен. Виктория Пээмот «Тыва хөгжүмде чылгы малдың ритми» деп темалыг шинчилелин бараалгаткан.
