Ажаалга банкының президентизи, баштаар чериниң даргазы Герман Греф бистиң республикага ажыл аайы-биле келгенин Тываның Баштыңы Владислав Ховалыг бодунуң блогунда дыңнаткан.
Хүндүлүг аалчыга Тываның турисчи арга-курлавырларын көргүзери-биле, республиканың онзагай бойдузун, аржаан сугларын таныштырып, чаартынган Чедер курортун, Дус-Хөл дустуг хөлдү, ол ышкаш ол чоогунда Хадың биле Каък-Хөлдүң эмнээр малгаштарын көргүскен. Ол ышкаш «Алдын-Булак» этнокультурлуг комплекске Герман Оскарович «Алаш» ансамбльдиң хөөмейжилерин дыңнаан.
"Россиядан Кыдатче Тываны таварты транспорт коридорун тудары дээн ышкаш, улуг хемчээлдиг төлевилелдерни чугааладым. Чөөн чүктүң медицина төвүн, үш сылдыстыг гостиницаны тударын, буддизм университедин ажыдарының планнарын сонуургаттывыс. Ажаалга банкызының деткиишкини-биле чиигелделиг ипотека чээлизинге туттунган найысылалдың чаа микрорайоннарын эргий көрдүвүс" – деп, Владислав Ховалыг үлешкен.
Тываның Баштыңы бистиң регион дыка хөй угланыышкыннарда – ипотека чээлизи, ырактан эмнээшкин, өөредилге программаларынга Ажаалга банкының деткимчезин ап турарын айыткан. Регионну чаагайжыдар болгаш спорт адырын хөгжүдер шугумда банкының республика-биле кады ажылдажылгазы бар.
«Ажаалга банкызының деткимчезинде туткан үш кудумчунуң бирээзиниң спортчу шөлүнге удавас Шумов алышкыларга тураскаал тургузар онзагай черни Герман Оскаровичиге көргүстүвүс. Ол шөлде спортчу тренировкаларга чогуур дериг-херекселдер шупту бар. Ажаалга банкызы-биле кады ажылдажылгавысты бедии-биле үнелеп, регион чурттакчыларның чаагай чоруу дээш ам-даа кады ажылдаар бис» – деп, Владислав Ховалыг чугаалаан.
Ийи таланың ужурашкаш, Ажаалга банкызы биле Тыва Республиканың Чазааның аразында кады ажылдажылга дугайында Дугуржулгага атты салганнар.
